Amérikaning xitaygha yürgüzgen tamozhna béji jazasi ijra qilinishqa bashlidi

Amérikaning tramp hökümiti kanada bilen méksikagha yürgüzgen 25 pirsent tamozhna béjini ijra qilishni waqitliq toxtitish bilen bir waqitta, xitaygha féntanil sewebidin yürgüzgen 10 pirsent tamozhna béjini 4-féwraldin bashlap resmiy ijra qilishqa bashlighan.

Amérika hökümiti xitayning méksikadiki zeherlik chékimlik guruhlirining féntanil ishlepchiqirishini xuruch bilen teminleydighan asasliq menbe ikenlikini bayqighan. Pirézidént tramp 20-yanwar wezipige olturup arqidinla méksika bilen kanadagha 25 pirsent, xitay, mehsulatlirigha 10 pirsent baj qoyidighanliqini élan qilghan. Pirézidént tramp, meqsitining bu arqiliq, xitayning féntanilning amérikagha kirishini cheklesh üchün heriket qollinishi heqqide bésim qilish ikenlikini éytqan. Tramp: “Xitayning bizge féntanil yollashni toxtitishini ümid qilimen, eger ular toxtatmisa, tamozhna béji körünerlik miqdarda artidu” dégenidi.

Lékin xitay, pirézidént trampning tamozhna béji qarari 4-féwral ijra qilinishqa bashlighan haman, amérika mehsulatlirigha qarita öch élish xaraktérlik tamozhna béji qoyidighanliqini élan qilghan. CNN Ning xewer qilishiche, xitay maliye ministirliqi amérikaning kömür we suyuqlandurulghan tebi'iy gaz mehsulatlirigha 15 pirsent, xam néfit, déhqanchiliq mashiniliri, chong tipliq aptomobil we yük toshush mashinilirigha 10 pirsent baj qoyidighanliqi, buning 10-féwraldin bashlap ijra qilinidighanliqini bildürgen. Shuning bilen bir waqitta xitay soda ministirliqi we tamozhna idarisi 4-féwraldin bashlap amérikagha 20 nechche xil métal mehsulati we munasiwetlik téxnologiyege éksport cheklimisi qoyidighanliqini jakarlighan.

Melum bolushiche, éksport cheklimisi sana'et we dölet mudapi'esi üchün halqiliq bolghan wolfram, shundaqla quyash énérgiyesi bataréyesige ishlitidighan télléy qatarliq maddilarni öz ichige alidiken. Amérika 4-féwral xitay mallirigha 10 pirsent baj qoyushni resmiy ijra qilishning harpisida, yeni 3-féwral aqsarayning bayanatchisi karolin léwit (Karoline Leavitt), trampning aldimizdiki künlerde xitay rehbiri shi jinping bilen téléfonda sözlishidighanliqini éytqan. Roytérsning bildürüshiche, weziyettin xewerdar erbablar xitay hökümitining tramp bilen tamozhna béjini kéchiktürüsh yaki toxtitish toghriliq bir kélishim hasil qilishning yolini qiliwatqanliqini éytqan.