Tramp hökümiti xitaygha qoyidighan mikro özek cheklimisini téximu kücheytidiken

Tramp hökümiti xitayning mikro özek (chip) ke érishishini cheklesh üchün uninggha baydin hökümitidinmu bekrek qattiq tedbir qollan'ghan.

“Blombérg xewerliri” torining 25-féwraldiki xewirige qarighanda, donald tramp hökümiti amérikaning yérim ötküzgüch téxnikisini téximu qattiq bashqurush tedbiri qollan'ghan hemde gollandiye, yaponiye qatarliq ittipaqdash döletlerning emeldarlirigha bésim qilip, yérim ötküzgüch téxnikisi saheside xitaygha qoyulghan cheklimini yenimu kücheytishni telep qilghan. Netijide, yaponiye mikro özek shirketlirining pay bahasi melum nisbette chüshken, emma amérikadiki niwidiya (Nvidia) shirkitining pay bahasida özgirish bolmighan.

Xewerde déyilishiche, tramp hökümiti yene baydin hökümiti dewride xitaygha mikro özek satqan niwidiya shirkitige téximu keng cheklime qoyush üchün, ijazetname telep qilinmaydighan mikro özek türlirinimu chekleshni oylashqan. Chünki niwidiya ilgiri xitaygha sétish cheklinidighan mikro özeklerning ornigha, ijazetname ketmeydighan bashqa türdiki mikro özeklerni ishlepchiqirip satqan, bu arqiliq amérikaning éksport cheklimisini buzghan. Nöwette amérika emeldarliri xitayning DeepSeek shirkitining sin'gapordiki wasitichiler arqiliq niwidiya shirkitining ilghar mikro özeklirini sétiwalghanliqini tekshürmekte iken. Eger bu ispatlansa, niwidiyaning mexsus xitay üchün layihelep satqan mikro'özeklirimu cheklinidiken.

Tramp hökümitidiki bir qisim emeldarlar yene xelq'ara yérim ötküzgüch ishlepchiqirish shirkiti (SMIC) ge qoyghan cheklimini kücheytmekchi bolghan, chünki bu shirket xitayning herbiy sana'itige yardem béridighan xu'awéy guruhi üchün mikro özek ishlepchiqiridiken.