Amérika, yaponiye, filippin qatarliq döletler xitayning jenubi déngizdiki tehditige qarshi téximu birlishidighanliqini jakarlighan

Xitayning sherqiy asiya déngiz tewelikide xojayinliq talishish urunushi küchiyiwatqan bir weziyette, amérika, yaponiye, filippin qatarliq döletlerning bashliqliri téximu küchlük hemkarlishishqa qesem qilishqan.

Ruytérs agéntliqi 12-yanwar bergen bu xewerde déyilishiche, amérika, yaponiye we filippinning dölet bashliqliri düshenbe küni (asiya waqti 12-yanwar) tor yighini échip, iqtisad, déngiz armiye küchliri we téxnika jehette hemkarliqni chongqurlashturushqa kélishken. Aqsarayning bu heqtiki bayanatigha qarighanda, yuqiriqi üch dölet rehberliri xitayning jenubi déngizdiki heriketlirining xeterlik we qanunsiz ikenlikini muzakire qilghan. Buningdin ilgiri ular, 2024-yil 4-ayda washin'gtonda birlikte yighin échip, xelq'ara qanun we rayon xewpsizlikini qoghdashni muzakire qilishqanidi.

Pirézidént jow baydén yene bir heptidin kéyin wezipisidin ayrilidighan bolup, u pirézidént donald trampning xitaygha taqabil turushta izchilliqni saqlishigha, amérikaning ittipaqdashliri bilen bolghan shériklik munasiwitige köngül bölüshige ümidwar qaraydighanliqini bildürgen.

“Kanada téléwiziye tori” ning 13-yanwardiki xewirige qarighanda, aldinqi hepte amérika bilen kanadaning urush paraxotliri xitay déngiz armiyesining jenubiy déngizni, jümlidin bu déngizdiki taqim arallarni tesir da'irisige élish urunushlirigha qarshi birlikte heriket qilghan؛ xitay déngiz armiye paraxotliri ularni teqip qilghan. Melum bolushiche, jenubiy déngizning astida 11 milyard tung néfit zapisi bayqalghan bolup, xitay 10 yildin buyan bu rayonni kontrol qilish arqiliq hindi-tinch okyandiki istratégiyelik tesir küchini ashurushqa urunup kelgen.