Xitaygha taqabil turushtiki sana'et meblegh iltimasi testiqlinish aldida
Xitaydin kéliwatqan köpligen tehditlerge taqabil turush üchün amérika hökümiti yéqindin buyan tégishlik tedbirlerni éliwatqan bolup, shularning biri amérika kéngesh palatasining amérika tarixidiki eng zor kölemlik sana'et qanunini maqullashqa tereddut qilishi iken. Bu yéngi qanun layihesi boyiche amérika hökümiti az dégendimu 250 milyard amérika dolliri ajritip, amérikaning ishlepchiqirish we téxnologiye sahesini janlanduridiken.
“Nyo-york waqti géziti” ning 7-iyundiki mulahize maqaliside körsitilishiche, 8-iyun küni awazgha qoyulidighan bu qanun layihesi asasliqi xitay hökümitining soda we herbiy ishlar sahesidiki tehditlirige taqabil turush üchün teyyarlan'ghan bolup, uning mutleq üstünlük bilen maqullinish éhtimalliqi bar iken. Buning bilen amérika hökümitining iqtisadiy sahege qol tiqmasliqtek siyasiti özgirip, yérim ötküzgüch ishlepchiqirishi, teqlidiy eqil, miqdarliq hésaplash qatarliq sahelerdiki téxnologiye üchün meblegh sélishni her ikki partiye qollaydighan weziyet yaritilidiken.
Nöwette amérika siyasiyonliri birdek xitayning eqliy mülük oghriliqi arqiliq yuqurida éytilghan pen-téxnika sahesidiki ishlepchiqirishni monopul qiliwalghanliqi, buning bilen amérika iqtisadining ghayet zor derijide xitaygha éqip kétiwatqanliqi, xitay hökümitining bolsa mushu iqtisadni desmaye qilip turup amérika üchün yéngi tehditlerni peyda qiliwatqanliqini buningdiki asasiy seweb qilip körsetken.
Kéngesh palatasining ezaliridin chak shumér bu heqte söz qilip: “Biz mushu sahelerdiki yétekchilik ornini qolgha alimiz, deydikenmiz jezmen mushu sahege mensup sana'etke meblegh ajritishimiz, shu arqiliq ish pursitinimu köpeytishimiz lazim,” dégen.
Maqalide körsitilishiche, amérika hökümitining bu yéngi tedbiri xitay ijra qiliwatqan “2025 Xitayda ishlen'gen” qurulushigha barawer kélidighan bolup, ular mushu arqiliq amérika hökümitining ittipaqdashlirini yuquri pen-téxnika sahesidiki ishlepchiqirishta xitaygha emes, belki amérikagha tayinishqa jelp qilishni közlimekte iken.