Amérika, en'giliye we awstiraliye xitaygha qarshi birliksep qurghan

Muxbirimiz irade
2021-09-16
Share

Amérika hökümiti en'giliye we awistiraliye bilen yéngi üch tereplik bixeterlik shériklik munasiwiti ornatqanliqini jakarlidi. Mezkur birliksep bu üch döletning xitaygha taqabil turush iqtidarini kücheytidiken.

CNN Téliwiziyesi bu heqtiki xewiride yuqiriqi bu üch dölet hemkarliqini "Xitaygha qarshi qurulghan qorghan" dep atighan. Bu hemkarliq kélishimi boyiche amérika awstraliyening yadro énérgiyelik su asti paraxoti yasap chiqishigha yardem qilidiken.

Mezkur hemkarliq kélishimi 15-séntebir charshenbe küni amérika prézidénti jow baydén, en'giliye bash weziri boris jonson we awistiraliye bash ministiri skot morrison birlikte ötküzgen sin yighini bilen élan qilin'ghan. Jow baydén yighindiki sözide béyjingning ismini ochuq tilgha almighan, biraq awstraliyening yadro énirgiyelik su asti paraxotigha ige bolushi heqqide toxtalghanda: "Döletler téz tereqqiy qiliwatqan tehditlerdin mudapiyelinish üchün eng yaxshi téxnikilargha ige bolushi kérek," dégen.

U yene mundaq dégen: "Bizning xelqlirimiz 100 yildin köprek waqittin buyan mürini-mürige tirep bille turup keldi. Bügün biz hemkarliqni chongqurlashturush we resmiyleshtürüsh üchün yene bir tarixiy qedem tashlawatimiz. . . Chünki hemmimiz hindi-ténch okyanning tinchliqi we muqimliqigha kapaletlik qilishning zörürlükini tonup yettuq".

CNN Téliwiziyesining bildürüshiche, awstraliyege qurashturulup bérilidighan herbiy paraxotlar awstiraliye déngiz armiyesining iqtidarini, bolupmu uning jenubiy déngizdiki heriket iqtidarini zor derijide ashuridiken. Ular yene tor bixeterliki, sün'iy eqil we kiwantum komputér téxnikisi tereqqiyati qatarliq sahelerdiki hemkarliqnimu ilgiri süridiken.

Xitayning washin'gitondiki bash elchixanisi 15-séntebir küni derhal bu birliksepke naraziliq bildürgen. Elchixana bayanatchisi lyu péngyu amérika, en'giliye we awstraliyeni tenqidlep: "Ular özlirining soghuq urush rohiy haliti we idiyiwi jehettiki bir tereplime qarishini yoqitishi kérek," dégen.

Melum bolushiche, mezkur hemkarliq qarari amérika prézidénti jow baydén kéler hepte "4 Dölet bixeterlik hemkarliqi yighini" boyiche yaponiye, hindistan we awstraliye rehberlirini tunji qétim yüzmu-yüz kütiwélishtin bir hepte burun élan qilin'ghan. "4 Dölet bixeterlik hemkarliqi" mu xitay tehditige qarshi qurulghan birliksep idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet