Amérikaning démokratchilardin bolghan kéngesh palata ezaliri xitaygha taqabil turushtiki keng kölemlik istratégiyesini élan qildi

Muxbirimiz irade
2020-09-17
Élxet
Pikir
Share
Print

Amérika kéngesh palatasining démokratchilar partiyesidin bolghan ezaliri xitaygha taqabil turushtiki keng kölemlik istratégiyesini tüzüp chiqqan.

"Nyu-york waqti géziti" ning xewirige qarighanda, bügün, yeni 17-séntebir peyshenbe küni dölet mejliside tonushturulidighan bu qanun layihesi boyiche aldimizdiki yillarda amérikaning sana'et iqtidarini ashurush we xitaygha taqabil turush üchün 350 milyard dollardin artuq meblegh teminlinidiken.

Bu qanun layihesi kéngesh palata ezasi chak shumér we bob ménéndéz bashchiliqida tonushturulghan bolup, u amérika dölitining ishlepchiqirish iqtidari we ul eslihelirini mustehkemlep, amérika shirketlirining riqabet küchini ashurushni közleydiken.

Diqqet qozghaydighini shuki, uningda Uyghurlargha munasiwetlik maddilarmu bar bolup, qanun layiheside xitay hökümitini Uyghurlargha qaratqan zulumi seweblik jazalash teklip qilin'ghan. Bu boyiche amérika prézidénti, shundaqla soda we maliye ministirliri Uyghurlarning mejburiy emgikidin bilip turup paydilan'ghan shexis we orunlarni birmu-bir tekshürüp békitishi we jazalishi kérekken.

Démokratchilar partiyesidin bolghan kéngesh palata ezaliri tüzüp chiqqan bu qanun layiheside amérikadiki pen-téxnika tetqiqati we tereqqiyatini kücheytish nuqtiliq tekitlen'gen bolup, bu sahege töt yilda 300 milyard dollar meblegh sélinidiken. Bundin sirt, yérim ötküzgüch yasashqa texminen 16 milyard dollar meblegh sélip, amérikaning bu sahede xitaydin üstünlükni saqlishi kapaletke ige qilinidiken.

Xitaygha qarshi layihelen'gen bu istratégiye boyiche, xitayning yer sharining teminlesh zenjiri bolushtek alahidilikini buzup tashlap, amérika dölet mudapiye ministirliqi qatarliq muhim orunlarning bir qisim kéreklik lazimetlerni amérikaning özidin yaki shérik döletlerdin teminlishi telep qilinidiken.

Mezkur qanun layihesi amérika dölet mejlisidiki démokratchi ezalarning bu yilliq prézidént saylimi aldida tashlighan muhim qedemlirining biri, dep bahalanmaqta.

Toluq bet