Уйғур елидин 4000 нәпәр алий мәктәп пүттүргән яш ичкири өлкиләргә “тәрбийилиниш” кә әвәтилидикән

Мухбиримиз ирадә
2016.12.22

Уйғур аптоном район даирилири 2017-йили ичидә уйғур елиниң җәнубидики үч вилайәт вә бир областики ишқа орунлишалмиған яшларни вә алий мәктәпләрни пүттүргән аз санлиқ милләт оқуғучилирини асас қилип туруп, йәнә 4000 нәпәр яшни ичкири өлкиләргә тәрбийиләшкә әвәтидикән.

Тәңритағ тори бу һәқтики хәвиридә, бу яшларниң шинҗаңға ярдәм бериватқан һәрқайси өлкиләрдики кархана вә асасий қатлам орунлирида “тәрбийилиниш”кә әвәтилидиғанлиқини билдүргән. Бирақ, чәтәлләрдики уйғур көзәткүчилири аллиқачан алий билим юртлирини пүттүрүп чиққан яшларни йәнә ичкири өлкиләргә аталмиш “тәрбийә елиш” қа әвәтишниң биһудилиқини әскәртип, бу сиясәт пәқәт яшларниң вақтини исрап қилиш, биһудә аваричилик туғдуруп зериктүрүш һәм асаслиқи уйғурларни асас қилған бу аз санлиқ милләт яшлирини тарқақлаштурушни мәқсәт қилған, дәйду.

Мәлум болушичә, иш күтүп турған алий мәктәп пүттүргән яшларни ичкиридә тәрбийиләш 2009‏-йилидики үрүмчи вәқәсидин кейин, 2010‏-йилидин етибарән йолға қоюлуватқан болуп, мушу бир йил ичидә 4200 нәпәргә йеқин ишсиз яш ичкири өлкиләргә әвәтилгән икән. Уйғур райони даирилири “ешинча әмгәк күчлирини йөткәп ишқа орунлаштуруш” сиясити бойичиму уйғур йезилиридики яшларниму ичкири өлкиләргә әрзан әмгәк күчи сүпитидә йөткәшни давам қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.