Уйғур гөдәклиригә хитай мәдәнийитини сиңдүрүш җиддий кеңәймәктә

Хитай һөкүмити уйғурлар диярида иҗра қиливатқан бастуруш сиясити сәвәблик көплигән уйғур өсмүрлириниң қаранчуқсиз қеливатқанлиқи мәлум болған иди. Йеқинда һәрқайси җайлардики уйғур башланғуч мәктәп оқуғучилириға хитай мәдәнийитини сиңдүрүшниң җиддий давам қиливатқанлиқи диққәт қозғашқа башлиди.

Хитай һөкүмити башқурушидики шинхуа агентлиқиниң 7-январдики хәвиридә ейтилишичә, лоп наһийәсидики уйғур өсмүрләр “тәклимакандики дөләт дәриҗилик намрат наһийә” дә болушиға қаримастин хитайчә чаңчилә өгинишни омумлаштурған. Хитай даирилири “маарипни әлалаштурушниң муһим қәдими” дәп тәрипләватқан бу истратегийәгә бинаән уйғур өсмүрлирини чаңчилә, хитайчә һөснхәт йезиш, яңгер уссули ойнаш, ‛үч хәтлик дәстур‚ни ядлаш, хитайниң таң вә соң дәвр нәзмлирини ядлаш қатарлиқларға тәшкиллимәктә икән.

Улар бу һәқтә мухбирларға сөз қилип: “бизниң чаңчилини лоп наһийәсигә елип келишимиз мол мәзмунлуқ бу әнәниви мәдәнийәтни уйғур өсмүрлириниң қәлбидә йилтиз татқузушни нишан қилған” дегән. Хәвәрдә ейтилишичә, әнхуй, бейҗиң қатарлиқ җайлардики аталмиш “шинҗаңға ярдәм бериш” шәһәрлири лоп наһийәси билән тохтам түзүп, йеқин кәлгүсидә чаңчилә өгитидиған техиму көп “мутәхәссисләр” ни әвәтиш һәққидә мәслиһәтләшкән.

“хитай хәвәрлири тори” ниң 4-январдики хәвиридиму хотән шәһиридики уйғур мәктәплиридә мушу хилдики хитай мәдәнийитини омумлаштуруш паалийәтлириниң омумлишиватқанлиқи хәвәр қилинған иди.