Uyghur gödeklirige xitay medeniyitini singdürüsh jiddiy kéngeymekte

• Muxbirimiz eziz
  2019-01-08

Xitay hökümiti Uyghurlar diyarida ijra qiliwatqan basturush siyasiti seweblik köpligen Uyghur ösmürlirining qaranchuqsiz qéliwatqanliqi melum bolghan idi. Yéqinda herqaysi jaylardiki Uyghur bashlan'ghuch mektep oqughuchilirigha xitay medeniyitini singdürüshning jiddiy dawam qiliwatqanliqi diqqet qozghashqa bashlidi.

Xitay hökümiti bashqurushidiki shinxu'a agéntliqining 7-yanwardiki xewiride éytilishiche, lop nahiyesidiki Uyghur ösmürler “Teklimakandiki dölet derijilik namrat nahiye” de bolushigha qarimastin xitayche changchile öginishni omumlashturghan. Xitay da'iriliri “Ma'aripni elalashturushning muhim qedimi” dep teriplewatqan bu istratégiyege bina'en Uyghur ösmürlirini changchile, xitayche hösnxet yézish, yanggér ussuli oynash, ‛üch xetlik destur‚ni yadlash, xitayning tang we song dewr nezmlirini yadlash qatarliqlargha teshkillimekte iken.

Ular bu heqte muxbirlargha söz qilip: “Bizning changchilini lop nahiyesige élip kélishimiz mol mezmunluq bu en'eniwi medeniyetni Uyghur ösmürlirining qelbide yiltiz tatquzushni nishan qilghan” dégen. Xewerde éytilishiche, enxuy, béyjing qatarliq jaylardiki atalmish “Shinjanggha yardem bérish” sheherliri lop nahiyesi bilen toxtam tüzüp, yéqin kelgüside changchile ögitidighan téximu köp “Mutexessisler” ni ewetish heqqide meslihetleshken.

“Xitay xewerliri tori” ning 4-yanwardiki xewiridimu xoten shehiridiki Uyghur mektepliride mushu xildiki xitay medeniyitini omumlashturush pa'aliyetlirining omumlishiwatqanliqi xewer qilin'ghan idi.