Хитайниң «милләтләр иттипақлиқи» намида уйғурларни езиватқанлиқи тәнқидләнмәктә

Мухбиримиз әзиз
2019-01-22
Елхәт
Пикир
Share
Принт

Уйғурлар дияридики лагерлар мәсилиси хәлқарадики чоң темилардин болуватқанда буниң арқисиға йошурунған «һәқсиз әмгәк» мәсилисини бир қисим анализчилар «уйғурларни әзгәнлик» дәп тәнқидлиди. Хоңкоңлуқ мустәқил язғучи люк хант имзасида елан қилинған чоң һәҗимлик мақалида мушу мәсилә нуқтилиқ муһакимә қилиниду.

Мақалә аптори йеқиндин буян уйғурлар дияридики бир қисим җаза лагерлириға қамалған уйғур тутқунларниң лагерларға қошна селинған завутларда толиму әрзан баһада әмгәккә селиниватқанлиқи көп тәрәплимә учурлардин мәлум болғанлиқини алаһидә тәкитләйду. Шуниңдәк хитай һөкүмитиниң уйғурлар диярида «милләтләр иттипақлиқи орнитиш арқилиқ инақ җәмийәт бәрпа қилиш» һәққидә дуняға бәргән вәдисиниң әмәлийәттә «алдамчилиқтин башқа нәрсә әмәслики» паш қилиниду.

Аптор нөвәттә мәлум болған бир қисим мәлуматлар, җүмлидин әркин асия радийоси дәлиллигән учурларға асасән бир қисим уйғур вә қазақ шаһитларниң лагерлардики тутқунларни әрзан баһалиқ әмгәк күчи орнида ишлитиш әһвалиниң мәвҗутлуқини, бу һалниң уларға берилгән миллий кимликтин ваз кечиш вә идийәви чүшәнчисини өзгәртиштәк сиясий җазаниң бир қисми болуп қеливатқанлиқини тилға алиду. Шуниңдәк лагерларниң мәвҗутлуқини изчил инкар қилип кәлгән хитай һөкүмитиниң тағдәк пакитлар алдида лагерларни «техника тәрбийәләш мәктипи» дәп ақлиғанлиқини алаһидә әскәртиду.

Аптор бу мәсилигә мисал қилип хотәндики «тәйда ширкити» ниң мушу хилдики уйғур тутқунларни «һәқсиз әмгәк» арқилиқ езиш бәдилигә ишләпчиқарған мәһсулатларни америка базирида сатмақчи болғанлиқини тилға алиду. Шуниңдәк хитай һөкүмитиниң бу әһвалниму инкар қилғанлиқини, әмма «тәйда ширкити» ниң директори ву хоңбониң мәркизий телевизийә истансисиға сөз қилғанда мушу хилдики лагерлар тәмин әткән әмгәк күчини ишләткәнликини махтинип сөзлигәнликини алаһидә қәйт қилиду.

Аптор лагерлар һәққидики омумий әһваллар билән хитай һөкүмитиниң ташқи дуняға «милләтләр иттипақлиқи» һәққидики шоарни дәсми қилип көрситиватқанлиқини селиштурған һалда хитайниң йәнә бир қетим зор алдамчилиқ қиливатқанлиқини, бу хил «һөкүмәт баш рол алған» алдамчилиқниң әнглийә һөкүмити хоңкоңни қайтуруп бәргәндин кейинму оттуриға чиққанлиқини баян қилип келип: «уйғурларниң башламчилири аллиқачан хитайниң бу сиясәтлири ирқий қирғинчилиққа апириду, дәп агаһландурған» дәйду. Шуниңдәк уйғурларниң лагерларға мәһкум болуши вә мәҗбурий әмгәккә селинишини әйни вақиттики натсист германийәсиниң полшадики җаза лагерлирида йәһудийларни әмгәккә селишиға охшитиду. Шуниңдәк шу вақиттики җаза лагерлириниң кириш еғизиға «әмгәк сизни һөрлүккә башлайду!» дегән хәтләр есилған чоң лозункилар есилғанлиқини әскәртиду.

Пикирләр (0)
Share
Толуқ бәт