Uyghur rayonidiki yeslide Uyghur balilirini xitaylashturushning her xil usulliri sinaq qilinmaqtiken
2022.05.04
Uyghur perzentlirini ata-anisidin yaki a'iliwi terbiye muhitidin ayriwétip, ularni kimlik éngidin we étiqad tuyghusidin mehrum qaldurush nöwette Uyghur rayonidiki köpligen yesli we mekteplerning asasliq nishani bolmaqta iken.
3-May küni “Shinxu'a tori” da élan qilin'ghan bir widiyoda, nigare isimlik bir yesli oqutquchisining yeslidiki balilargha qatnash qa'idilirini teqlidiy oyunlar bilen ögetkenliki teshwiq qilin'ghan bolup, widiyodiki körünüshlerdin yesli balilirining kündilik turmushidiki qoyuq xitayche alahidilik közge chéliqidu.
Qomul sheherlik 11-yeslide élin'ghan bu widiyoda yeslide ariliship oquwatqan Uyghur perzentliri bilen xitay balilirining yétip-qopush, yep-ichish we oynashta bille ikenliki, öz ara paranglirining tamamen xitayche ikenliki, bir-birige yardemliship, ijil-inaq yashaydighanliqi alahide körsitilgen.
Tetqiqatchi adriyan zéniz Uyghur irqiy qirghinchiliqining köp tereplimilik alahidiliki heqqide toxtalghanda, keng-kölemlik, sistémiliq élip bériliwatqan medeniyet qirghinchiliqini tilgha alghan bolup, chén chüen'go otturigha qoyghan “Uyghurlarni yiltizidin ayriwétish” dégini emeliyette Uyghur perzentlirini ata-anisidin, a'iliwi muhitidin ayriwétip, ularni xitay éngi boyiche terbiyelesh iken we buning tunji qedimi yeslidin bashlinidiken.