Xitay hökümiti Uyghur élide "Jungxu'a en'eniwi medeniyitini öginish" ni telep qilmaqta

Muxbirimiz irade
2019-05-14
Élxet
Pikir
Share
Print

Xitay hökümiti Uyghur élide "Junggoche sotsiyalizm idiyesini, jungxu'aning en'eniwi medeniyitini öginishni keng qanat yaydurush" heqqide yéngi bir nöwetlik idé'ologiyelik teshwiqat pa'aliyetlirini dawamlashturmaqta.

Tengritagh tori we aqsu axbarat tori qatarliqlarda bu heqte tarqitilghan xewerlerdin qarighanda, Uyghur rayoni da'iriliri mexsus herqaysi jaylarda "Jungxu'aning en'eniwi medeniyitini zor küch bilen ewj aldurushni, jungxu'aning en'eniwi medeniyitige qet'iy warisliq qilishni" telep qilishqan.

Aqsu axbarat torining xewiridin qarighanda, aqsu wilayetlik partkom nezeriye öginish merkiziy guruppisi 5  ayning 8  küni 6  qétim kolléktip öginish qilghan. Yighinda "Shi jinpingning yéngi dewr junggoche sotsiyalizm idiyesini chongqur öginip, özleshtürüp, junggoche sotsiyalistik medeniyetni méngige, qelblerge chongqur singdürüsh" dégenler tekitlen'gen.

Közetküchilerning qarishiche, xitay hökümiti yéqinqi yillardin buyan atalmish "Jungxu'a medeniyiti", "Jungxu'a milliti" dégen uqumlarni bazargha sélop we Uyghurlarning öz tarixi, öz medeniyiti we milliy kimlikidin pexirlinish rohini cheklep, uning ornigha jungxu'a milliy kimlikini tiklimekte shuningdek emeliyette xitay medeniyitini, xitay milletchilikini terghib qilip kelmektiken.

Xitayning bu herikiti, bolupmu 2017-yilidin bashlap, 800 mingdin 2 milyon'ghiche Uyghurni "Qayta terbiye lagérliri" gha qamashni bashlighandin béri hessilep kücheygen. U, Uyghur élide xitayning chaghan bayrimi, panus bayrimi dégendek bayramlirining daghdugha bilen tebriklinishi, Uyghurlargha panus we mesnewi tarqitip bérilishi, Uyghur balilirining mektep we yeslilerde xitayche pasonda kiyindürülüp jingjüge oynashqa, xitayning klassik tiyatirlirini oynash, klassik shé'irlirini yadlashqa sélinishi bilen roshen ipadilen'gen.

Közetküchiler "Jungxu'aning en'eniwi medeniyitini zor küch bilen ewj aldurushni" tekitlesh xitay hökümitining Uyghurlarning milliy kimlikige wekillik qilidighan barliq éléméntlarni süpürüp tashlash üchün jiddiy heriketke ötkenlikidin dérek béridu, dep qarimaqta.

Toluq bet