“Xitaylashturush” siyasiti bundin kéyinki “Milletler xizmiti” ning asasi bolmaqchi

Xitay hökümitining ötken birnechche yilda teshwiq qilip kéliwatqan “Jungxu'a milliti ortaq gewdisi kimliki chüshenchisini mustehkemlesh” chaqiriqi yéqinda resmiy yosunda “Qibliname” basquchigha kötürüldi. “Shinjang géziti” ning 7-séntebirdiki xewiride éytilishiche, Uyghur aptonom rayonluq hökümet buni resmiy muzakire qilghan hemde buni ashkara jakarlighan.

Xewerde éytilishiche, ürümchide échilghan “Merkez milliy ishlar xizmiti yighini” ning rohini öginish yighinida “Shi jinpingning merkez milliy ishlar xizmiti yighinida sözligen sözini este mehkem saqlash hemde jungxu'a milliti ortaq gewdisi kimliki chüshenchisini yéngi dewrdiki milletler ishliri xizmitining merkiziy nuqtisi qilish, shu arqiliq shinjangda uzun mezgillik eminlik berpa qilish lazim” dégen xulase chiqirilghan. Shundaqla éniq qilip “Jungxu'a milliti ortaq kimliki chüshenchisi berpa qilish bundin kéyinki milliy ishlar xizmitining yétekchi idiyesi bolidu” dep körsitilgen.

Türlük uchur menbeliri ötken birnechche yilda xitay hökümitining Uyghur diyarida Uyghur milliy kimlikini ipade qilghuchi barliq shey'ilerni yoqitiwatqanliqini namayan qilghan idi. Emdilikte “Xitaylashturush” menisidiki “Jungxu'a ortaq kimliki chüshenchisi” ni milliy ishlar xizmitining yétekchi idiyesi qilish heqqidiki chaqiriq buning ijra qilish basquchigha ötkenlikini körsetken. Téxi yéqinda “Kommunizm qurbanliri xatire fondi” ning tetqiqatchisi doktur adryan zénz xitay hökümiti üchün maqale yéziwatqan bir qisim xitay “Alimliri” ning ashkara halda “Uyghurlarning jenubiy shinjang rayonidiki nopus qurulmisida mutleq üstünlükni igilishi nöwettiki térrorluq hadisilirining bir muhim menbesi. Buni tügitish üchün bu jaylardiki xitay nopusining sanini ashurush lazim” dégenlikini körsetkenidi.