Хитай даирилири уйғур районида аталмиш “җоңхуа әхлақи” ни базарға селишқа башлиған

Мухбиримиз нуриман
2021-11-26
Share

Хәлқара кишилик һоқуқ тәшкилатлири вә америка қатарлиқ ғәрб демократик дөләтлири һөкүмәтлири хитай даирилириниң уйғурларниң миллий вә диний кимлики түпәйлидин йүргүзүватқан бастурушлирини “инсанийәткә қарши җинайәт”, “ирқий қирғинчилиқ” дәп әйибләватқан бу мәзгилдә, хитай һөкүмити уйғурларниң кимликини йоқтишни мәқсәт қилған бир қатар сиясәтлирини давамлиқ йүргүзмәктикән.

Хитай һөкүмитиниң башқурушидики “тәңритағ” ториниң бүгүнки хәвиригә қариғанда, уйғур аптоном районлуқ партком вә биңтуән парткоминиң секретари чин чуәнго, уйғур аптоном районлуқ һөкүмәтниң мувәққәт рәиси әркин тунияз қатарлиқ юқири дәриҗилик әмәлдарлар уйғур районидин “мәмликәтлик әхлақ нәмуниси” болуп талланған намзатлар билән көрүшкән. Чин чуәнго уларға сөз қилип: “хитайниң әнәниви әхлақ мизанлириға варислиқ қилиш вә уни илгири сүрүш, ‛җуңхуа миллити‚ ортақ еңини турғузуш, шундақла партийәгә садиқ болуш” ни тәләп қилған. У сөзидә йәнә аталмиш “җоңхуа миллити” кимликини турғузушни, хитайниң “мәмликәтлик әхлақ нәмуниси” болушниң муһим өлчими икәнликини тәкитлигән.

Хәвәрдин мәлум болушичә, хитай даирилири уйғур районида аталмиш “җоңхуа мәдәнийити” ни “гүзәл әхлақ” ниң өлчими сүпитидә кәң көләмдә тәрғип қилишқа башлиған, шундақла уни райондики уйғурларни асас қилған башқа йәрлик милләтләрниң әнәнивий әхлақ системиси вә өзигә хас қиммәт қарашлириниң орниға дәсситишкә урунған.

Игилинишичә, уйғур районидин алдинқи йили “мәмликәтлик әхлақ нәмуниси” болуп баһаланған шәхсләр ичидә учтурпан наһийәсидики қизил актип қурбан ниязму бар иди. У учтурпан наһийәсидә уйғур балилирини хитай тили вә хитай әнәнивий мәдәнийити билән тәрбийәләйдиған аталмиш “дөләт тили мәктипи” ечип, хитай даирилириниң уйғурларни хитайлаштуруш сияситигә актиплиқ билән янтаяқ болған иди. Көзәткүчиләр, уйғур районидин бу йиллиқ хитайниң “мәмликәтлик әхлақ нәмуниси” тизимликигә талланған намзатларниң қизил актип қурбан нияз типидики кишиләрдин икәнликини тәхмин қилишмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт