Xitay da'iriliri Uyghur rayonida atalmish "Jongxu'a exlaqi" ni bazargha sélishqa bashlighan

Muxbirimiz nur'iman
2021-11-26
Share

Xelq'ara kishilik hoquq teshkilatliri we amérika qatarliq gherb démokratik döletliri hökümetliri xitay da'irilirining Uyghurlarning milliy we diniy kimliki tüpeylidin yürgüzüwatqan basturushlirini "Insaniyetke qarshi jinayet", "Irqiy qirghinchiliq" dep eyiblewatqan bu mezgilde, xitay hökümiti Uyghurlarning kimlikini yoqtishni meqset qilghan bir qatar siyasetlirini dawamliq yürgüzmektiken.

Xitay hökümitining bashqurushidiki "Tengritagh" torining bügünki xewirige qarighanda, Uyghur aptonom rayonluq partkom we bingtu'en partkomining sékrétari chin chu'en'go, Uyghur aptonom rayonluq hökümetning muweqqet re'isi erkin tuniyaz qatarliq yuqiri derijilik emeldarlar Uyghur rayonidin "Memliketlik exlaq nemunisi" bolup tallan'ghan namzatlar bilen körüshken. Chin chu'en'go ulargha söz qilip: "Xitayning en'eniwi exlaq mizanlirigha warisliq qilish we uni ilgiri sürüsh, 'jungxu'a milliti' ortaq éngini turghuzush, shundaqla partiyege sadiq bolush" ni telep qilghan. U sözide yene atalmish "Jongxu'a milliti" kimlikini turghuzushni, xitayning "Memliketlik exlaq nemunisi" bolushning muhim ölchimi ikenlikini tekitligen.

Xewerdin melum bolushiche, xitay da'iriliri Uyghur rayonida atalmish "Jongxu'a medeniyiti" ni "Güzel exlaq" ning ölchimi süpitide keng kölemde terghip qilishqa bashlighan, shundaqla uni rayondiki Uyghurlarni asas qilghan bashqa yerlik milletlerning en'eniwiy exlaq sistémisi we özige xas qimmet qarashlirining ornigha dessitishke urun'ghan.

Igilinishiche, Uyghur rayonidin aldinqi yili "Memliketlik exlaq nemunisi" bolup bahalan'ghan shexsler ichide uchturpan nahiyesidiki qizil aktip qurban niyazmu bar idi. U uchturpan nahiyeside Uyghur balilirini xitay tili we xitay en'eniwiy medeniyiti bilen terbiyeleydighan atalmish "Dölet tili mektipi" échip, xitay da'irilirining Uyghurlarni xitaylashturush siyasitige aktipliq bilen yantayaq bolghan idi. Közetküchiler, Uyghur rayonidin bu yilliq xitayning "Memliketlik exlaq nemunisi" tizimlikige tallan'ghan namzatlarning qizil aktip qurban niyaz tipidiki kishilerdin ikenlikini texmin qilishmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet