Donald trampning bixeterlik ishliri yardemchisi xitayni xitayche eyiblidi

Amérika prézidénti donald trampning dölet bixeterlik ishliri boyiche yardemchi meslihetchisi bolghan met pattinjir xitaydiki hemmige tonushluq “4-May yashlar bayrimi” künide rawan xitay tilida téléwiziye nutqi sözlep, xitay hökümitining nöwette otturigha chiqiwatqan démokratiye teleplirini boghup qoyuwatqanliqini eyiblidi.

Wirjiniye uniwérsitétida ötküzülgen tor muhakimiside u buningdin 101 yil ilgiri xitay oqughuchilarning “Wéérsal sülhi yighini” ning xitay heqqidiki tengsiz shertnamisige naraziliq bildürüp namayish qilghanliqi we hökümetke telep qoyghanliqini, buning bilen xitay hökümitining tengsiz shertnamige imza qoymighanliqini eslitidu. U téléwiziye nutqida “Zamaniwi xitay qurup chiqish rohidin ilhamlan'ghan bu qehrimanlar démokratik idiyelerdin ozuq alghan insanlar idi. Bügünki künde ‛4-may herikiti‚ning rohi qeyerde?” deydu. Shundaqla xitay doxturlardin li wénlyang qatarliq kishilerning del ashu xildiki qehrimanliq rohi bilen heqiqetni sözligenliki üchün “Awazi jimiqturulghan” liqni tekitlep, mushuninggha ‍oxshash köpligen heq sözlük insanlarning, jümlidin rén jichyang, shü jiyong, ilham toxti qatarliqlarning ghayib qiliwétilgenlikini, heqiqetni xewer qiliwatqan 13 neper amérika muxbirining xitaydin chiqiriwétilgenlikini yene bir qétim tilgha alidu.

U nutqining axirida xitayning ötken mezgillerde iqtisad we soda saheside muhim orunni igileshke bashlighan bolsimu, emma démokratiye saheside buningdin bir esir ilgiriki “4-May herikiti” chilikmu bolalmighanliqini, xelqning démokratiye telipige shu waqittiki hökümetchilikmu étibar bérelmigenlikini alahide tekitleydu. Chet'eldiki xitay öktichiliri bu heqte pikir qilip “Démisimu ‛4-may herikiti‚din kéyin xitaydiki démokratiye we ilim-pen saheside héchqanche algha ilgirilesh menzirisi barliqqa kelgini yoq” dédi.