Доналд трампниң бихәтәрлик ишлири ярдәмчиси хитайни хитайчә әйиблиди

Мухбиримиз әзиз
2020-05-05
Елхәт
Пикир
Share
Принт

Америка президенти доналд трампниң дөләт бихәтәрлик ишлири бойичә ярдәмчи мәслиһәтчиси болған мәт паттинҗир хитайдики һәммигә тонушлуқ «4-май яшлар байрими» күнидә раван хитай тилида телевизийә нутқи сөзләп, хитай һөкүмитиниң нөвәттә оттуриға чиқиватқан демократийә тәләплирини боғуп қоюватқанлиқини әйиблиди.

Вирҗинийә университетида өткүзүлгән тор муһакимисидә у буниңдин 101 йил илгири хитай оқуғучиларниң «веерсал сүлһи йиғини» ниң хитай һәққидики тәңсиз шәртнамисигә наразилиқ билдүрүп намайиш қилғанлиқи вә һөкүмәткә тәләп қойғанлиқини, буниң билән хитай һөкүмитиниң тәңсиз шәртнамигә имза қоймиғанлиқини әслитиду. У телевизийә нутқида «заманиви хитай қуруп чиқиш роһидин илһамланған бу қәһриманлар демократик идийәләрдин озуқ алған инсанлар иди. Бүгүнки күндә ‹4-май һәрикити'ниң роһи қәйәрдә?» дәйду. Шундақла хитай дохтурлардин ли венляң қатарлиқ кишиләрниң дәл ашу хилдики қәһриманлиқ роһи билән һәқиқәтни сөзлигәнлики үчүн «авази җимиқтурулған» лиқни тәкитләп, мушуниңға ‍охшаш көплигән һәқ сөзлүк инсанларниң, җүмлидин рен җичяң, шү җийоң, илһам тохти қатарлиқларниң ғайиб қиливетилгәнликини, һәқиқәтни хәвәр қиливатқан 13 нәпәр америка мухбириниң хитайдин чиқириветилгәнликини йәнә бир қетим тилға алиду.

У нутқиниң ахирида хитайниң өткән мәзгилләрдә иқтисад вә сода саһәсидә муһим орунни игиләшкә башлиған болсиму, әмма демократийә саһәсидә буниңдин бир әсир илгирики «4-май һәрикити» чиликму болалмиғанлиқини, хәлқниң демократийә тәлипигә шу вақиттики һөкүмәтчиликму етибар берәлмигәнликини алаһидә тәкитләйду. Чәтәлдики хитай өктичилири бу һәқтә пикир қилип «демисиму ‹4-май һәрикити'дин кейин хитайдики демократийә вә илим-пән саһәсидә һечқанчә алға илгириләш мәнзириси барлиққа кәлгини йоқ» деди.

Пикирләр (0)
Share
Толуқ бәт