Amérika tashqi ishlar ministirliqi xitaygha taqabil turush üchün “Xitayni közitish jemgahi” qurushni pilanlighan

“Tashqi siyaset” zhurnilida bérilgen melumattin qarighanda, amérika tashqi ishlar ministirliqi xitay hökümitining dunyadiki asasliq döletlerde künséri küchiyiwatqan tesirini iz qoghlap tekshürüsh üchün xitay emeldarlirining sani we herikitini mexsus közitishni kücheytmekchi bolghan. Shundaq bolghanda, amérika tashqi ishlar ministirliqi bu wezipe üchün 20 din 30 gha yéqin kishini köpeytidiken. Bular omumlashturulup “Xitayni közitish jemgahi” (China House) dep atalghan. Bundaq wezipe öteydighan xizmetchi xadimlar eng deslepte sabiq prézidént tramp dewridila teyinlen'gen bolup, amérika tashqi ishlar ministirliqining bashqurushida xitay hökümitining dunyaning her qaysi jayliridiki herikitini iz qoghlap tekshürüshke mes'ul bolghan.

Ehwaldin xewerdar kishilerning bildürüshiche, amérika tashqi ishlar ministirliqi washin'gtonda we dunyaning her qaysi jayliridiki amérika elchixanilirida xitayning alahide döletlerdiki pa'aliyetlirini nazaret qilidighan xadimlarni köpeytishni teshebbus qilghan. Amérika tashqi ishlar ministirliqi yene xitayning yéngi téxnika sétiwélish we kilimat özgirishi ehwalini közitish üchün dawamliq türde xadim köpeytishni oylishiwétiptu.

Bloomberg Agéntliqi bu yil 8-ayda amérika merkiziy axbarat idarisiningmu mexsus xitaygha taqabil turidighan alahide tarmiqi qurush pilani barliqini xewer qilghanidi. Analizchilar buning amérika bixeterlik organlirining amérika bilen xitay otturisidiki gi'o-siyasiy riqabet dewrige maslishish üchün qurulidighanliqini tehlil qilishqanidi.

Tramp dewridiki amérika tashqi ishlar minsitirliqining bir emeldari mundaq dégen: “Eger siz xitayni chekleydighan jaza layihisi tüzmekchi bolsingiz, buni qilalaydighan iqtidaringiz bolushi kérek. Amérika tashqi ishlar ministirliqi xitay ishliri ishxanisi bu ishlar üchün qurulmighan. Bu qétim xitaygha bashqiche pozitsiye shekillendi. Tarixtin qaraydighan bolsaq, biz tünügün'giche téxi xitayni bizge dost bolidu dep qarap kelgeniduq”.

Qeyt qilinishiche, amérika tashqi ishlar ministirliqining bu yéngi pilani amérikaning her qaysi shitatliridiki fédératsiyelik hökümet organlirida xitay ishliri bilen shughullinidighan emeldarlar we xizmetchilerni birleshtürüp, xitaygha taqabil turushta küchlük sep shekillendüreleydiken.