Amérika hökümiti xitayning 26 paxta shirkitini Uyghur mejburiy emgikige chétishliq dep chekligen

16-May küni, amérika hökümiti Uyghur mejburiy emgiki bilen ishlepchiqirilghan mehsulatlarning amérika bazirigha kirishining aldini élish üchün, xitayning paxta tijariti bilen shughullinidighan 26 shirkiti we ambirini qara tizimlikke kirgüzüp, ulardin paxta import qilishni chekligen.

Amérika ana weten xewpsizliki ministirliqining bayanatida körsitilishiche, tizimliktiki paxta shirketlirining köpinchisi Uyghur élining sirtida bolsimu, biraq ular paxtini Uyghur élidin kirgüzidiken.

Amérika hökümiti 2021-yili “Uyghur mejburiy emgikining aldini élish qanuni” ni ijra qilghandin buyan 65 orunni soda qara tizimlikige kirgüzgen bolup, mezkur 26 paxta shirkiti we zawutliri bu tizimlikke qoshulghan eng yéngi orunlar bolup hésablinidiken.

Ana weten xewpsizlik ministiri aléhandro mayorkas bayanatta yer alghan sözide mundaq dégen: “Yuqiridiki bu cheklime mes'uliyet bilen tijaret qilidighan shirketlerning diqqet bilen ish körüshige yardem béridu, shundaq bolghandila biz birlikte mejburiy emgek mehsulatlirining dölitimizge kirishining aldini alalaymiz”.

Amérika ana weten xewpsizliki ministirliqining 26 xitay shirkiti we mu'essesesige qaratqan bu cheklimisi amérika dölet mejlisi ezalirining alqishigha érishken. Amérika awam palata ezasi kiris simis we kéngesh palata ezasi jéf mérkléy derhal bayanat élan qilip, bu qararni qollaydighanliqini ipade qilish bilen birge, bu cheklimining “Uyghur mejburiy emgiki bilen bulghan'ghan birikme kiristalliq silitsiy, alyumin, birikme xilorid we yérim birikme tala sana'iti qatarliqlargha kéngeytilishini” telep qilghan.