“Shinjang wekiller ömiki”ning bayanatchisi: “Shinjanggha meblegh sélish — xitayning kélechilikige meblegh sélishtur”

Xitay kompartiyesining 20 -qurultiyigha Uyghur aptonom rayoni namidin qatnishiwatqan “Shinjang wekilliri”ning bayanatchisi jang chünlin, xitayning Uyghur rayonida buningdin kéyin yürgüzidighan siyasitining yölinishidin bisharet bergen. Uning éytishiche, “Shinjanggha meblegh sélish xitayning kélechikige meblegh sélish” hésaplinidiken.

Chet eldiki Uyghur éli weziyitini yéqindin közitiwatqan analizchilar, xitay kompartiyesining 20-qurultiyigha qatnishiwatqan atalmish “Shinjang wekiller ömiki” bayanatchisining sözi, xitayning kelgüsi tereqqiyatining dawamliq Uyghur élini “Échish”qa merkezlishidighanliqi, shundaqla Uyghurlarni xitay karxanilirining erzan bahaliq mejburiy emgek küchlirige aylandurushni dawamlashturidighanliqidin dérek béridighanliqini bildürmekte.

“Xitay xewerliri” torining éytishiche, xitay kompartiyesining 20-qurultiyigha qatnishiwatqan atalmish “Shinjang wekiller ömiki”ning bayanatchisi, Uyghur aptonom rayonluq partkomning mu'awin sékritari, teshwiqat bölümining bashliqi jang chünlin, 20-öktebir béyjingda xitay taratqulirining so'allirigha jawab bergen. U muxbirlarni kütiwélish yighinida, xitayning Uyghur élida yéqinqi 10 yildin béri yesli ma'aripi qurulushi, Uyghurlarni éshinche emgek küchi namida xitay karxanilirigha orunlashturush, kentlerni köchürüsh qatarliq jehetlerde érishken “Utuqliri”ni bayan qilip ötken, andin “Shinjanggha meblegh sélish — xitayning kélechikige meblegh sélishtur” dep körsetken.

Jang chünlinning éytishiche, Uyghur élida yéqinqi 10 yil ichide 6353 yesli qurulghan, 2 milyon 380 ming 530 yürüsh kapalet xaraktérlik öy sélinip, 2 milyon 360 ming 980 a'ile, 10 milyondin artuq kishi köchürülgen.

U yene 3666 namrat kent we 3 milyon 60 ming 49 neper namrat nupusning hemmisi namratliqtin qutulghanliqi, déhqan -charwichilarning ishik aldidiki mikro zawutlargha we sana'et baghchilirida ishqa orunlishishi emelge ashqanliqini éytqan. Halbuki, lagérdin qoyup bérilgendin kéyin chet elge chiqishqa muweppeq bolghan lagér shahitlirining éytishiche, jang chünlin tilgha alghan “Ishik aldidiki mikro zawutlar” we sana'et baghchiliri emeliyette xitay xususiy shirketlirining mejburiy emgek karxaniliri iken.