"Xitayperes" dep tenqidlen'gen awstraliye dölet uniwérsitétining proféssori jéyn galléy wezipisidin istipa bergen

Muxbirimiz eziz
2021-08-31
Share

Awstraliye döletlik uniwérsitétning proféssori, "Xitay tetqiqat merkizi" ning diréktori jéyn galléy yéqinda öz wezipisidin istipa bergenlikini élan qilghan. "Awstraliye pul-mu'amile tekshürüshi" gézitining 30-awghusttiki sanida éytilishiche, proféssor jéyn galléy nöwette "Dem élish" namida mekteptin ayrilghan, emma uning "Xitay tetqiqat merkizi" ning diréktorluq wezipisini bashqilar ötküzüwalghan.

Melum bolushiche, 2021-yilining béshida proféssor jéyn galléy Uyghur diyaridiki zor tutqun heqqide söz qilip: "Imzasiz bir parche 'ilmiy maqale' ge asaslan'ghanda, 'bir milyon Uyghur lagérgha qamalghan' dégen uchurning köptürme ikenliki" ni tekitligen. Shundaqla "Bu imzasiz maqale gherb dunyasidiki axbarat sahesining Uyghurlar heqqidiki köpligen melumatlirini inkar qilidu" dégen. Emma shuningdin kéyinla u yamghurdek tenqid we ‍eyibleshlerge kömülüp ketken, shundaqla kishilerning "Xitayperes saxta alim" dégendek hujumlirigha uchrighan idi.

Xewerde éytilishiche, proféssor jéyn galléy "Imzasiz maqale" ni özige bergen kishining awstraliyening xitaydiki sabiq bash elchisi ikenlikini éytqan, emma u kishining ismini éytishni ret qilghan. U kéyinche bu heqte söz qilip: "Men bu 'imzasiz maqale' ni gérmaniyelik adryan zénzning Uyghurlar heqqidiki eserlirige 'jeng élan qilip baqsa iken' dep oylighan. Emma hergizmu uning eserlirini 'ret qilsiken' dep oylimighan," dégen.

Nöwette uniwérsitét rehberliki uning istipa bérishini "Pütünley shexsiy tallash" dep sherhiligen bolsimu, emma uning dunyawiy tenqid obyékti bolup qalghanliqi buningdiki bir muhim seweb, dep qaralmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet