Qeshqerdiki alte ming kishilik xizmet yermenkiside kim ishqa orunlishidu?

Washin'gtondin muxbirimiz uyghar teyyarlidi
2024.02.27

Qeshqer shehiri adem küchi bayliqi we ijtima'iy kapalet idarisi sahibxaniliqida 2024-yilliq “Bahar shamili herikiti: xizmet we ishlepchiqirishni eslige keltürüsh” namidiki chong kölemlik xizmet yermenkisi qeshqer xelq meydanida échilghan hemde alte ming kishilik xizmet orni bazargha sélin'ghan.

“Xitay tori” ning 2024-yili 2-ayning 27-kündiki xewiride mundaq déyilgen: “Bu xizmet yermenkisi ixtisasliqlarni qollap, ammining köngüldikidek xizmet tépishigha we shirketlerning köngüldikidek ishchi qobul qilishigha yardem béridu. Shuning bilen birge bu xizmet yermenkisi yerlik iqtisad we jem'iyetning yuqiri süpetlik tereqqiyatini ilgiri süridu.”

Qeshqer adem küchi bayliqi we ijtima'iy kapalet idarisi terbiyelesh we ishqa orunlashturush mulazimet merkizining mes'uli li linshyu bu yermenkige jem'iy 160 shirketning qatnashqanliqini, shuningdek alte mingdin artuq xizmet ornining temin étilgenlikini maxtinish ichide tilgha alghan. Emma bu qétimqi yermenkide kimning ishqa élinidighanliqi heqqide chüshenche bermigen.

Halbuki, yéqinqi melumatlar xitaydiki ishsizliqning éship bériwatqanliqi hemde Uyghur diyarigha köchüp kelgen xitay yashlirigha bérilidighan köpligen étibar chariliri köpligen xitay yashlirining Uyghur diyaridin xizmet izdishige türtke boluwatqanliqini körsitidu. Xitay hökümitining munasiwetlik höjjetliri bolsa 2014-yildin 2019-yilghiche bolghan ariliqta her yili Uyghur éli nopusining 10% tin köprekining (ikki yérim milyon adem qétim) mejburiy yosunda bashqa jaylargha yötkiliwatqanliqini körsetken. Bu pa'aliyet xitay yolgha qoyghan éshincha emgek küchlirini yötkesh chong pirogrammisining bir qismi bolup, Uyghurlar sana'etke lazimliq emgek küchi süpitide pütün memliketke mejburiy ewetilgen. Shuning bilen bir waqitta, minglighan Uyghur ixtisas igiliri, jümlidin aliy mektepni tamamlighan oqughuchilar lagér we türmilerge qamalghan. Mushu xil ré'alliq bolsa bu qétimqi qeshqer ixtisas igiliri yermenkiside yenila xitaylarning asasliq qobul qilish obyékti bolup qalidighanliqidin bésharet, dep qaralmaqta.

Mutexessislerdin doktor adri'an zénz Uyghur diyaridiki éshincha emgek küchlirini yötkesh programmisini “Bu bir türlük kontrol qilish we assimilyatsiye qilish istratégiyesi bolup, Uyghur medeniyitini yoqitish üchün layihelen'gen” dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.