Xongkong öktichiler rehbiri xongkong xelqini namayish qilip, erkinlikni qoghdashqa chaqirdi

Muxbirimiz erkin
2016-01-08
Share

Xongkong öktichiler guruhining rehbiri, sabiq memuri mehkime bash katipi chénfang enshing xongkong xelqini namayish qilip, xongkong tungliwen kitabxanisining bashliqi li bo qatarliq 5 neper kitabxana xadimining iz-dérikini qilishqa chaqirghan.

Chénfang enshing jüme küni qilghan sözide: "Li boning yoqap kétishi nurghun mesilini, xususen qanun-tüzüm, erkinlik, kishilik bixeterlik, bir dölette ikki xil tüzüm qatarliq mesililerni otturigha chiqirip, xelqni endishige saldi. Shunga, biz xongkong xelqini yekshenbe küni ötküzülidighan namayishqa qatnishishqa chaqirimiz" dégen

Tungliwen kitabxanisi izchil xitay aliy derijilik rehberlirining a'ile turmushi we mexpiy ishlirigha da'ir kitablarni neshr qilish bilen tonulghan neshriyat orni. Lékin ötken yilning axiri mezkur kitabxanining bashliqi li bo we qalghan 4 neper xadimi iz -déreksiz yoqap ketken.

Xitay hökümiti hazirgha qeder ochuq ipade bildürmigen bolsimu, emma ularni xitay bixeterlik xadimliri tutup ketken bolushi mumkin, dep guman qozghalghan.

Chénfang enshing sözide: "Bu intayin éghir weqe. Meyli xongkongning edliye musteqilliqi bolsun, meyli xongkong xelqining 'tüp qanun' da kapaletke ige söz erkinliki, neshriyat erkinliki, kishilik erkinlikning dexli-teruzsizliqi yaki bir dölette ikki xil tüzümni emeliyleshtürüsh bolsun, bu weqe 2003‏-yili dölet bixeterlik qanun layihesi otturigha qoyulghandin buyan uchrighan eng éghir xiris" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet