Xongkong namayishida Uyghurlar mesilisi yene bir qétim janliq tilgha élindi

Xongkongda dawam qiliwatqan xelq namayishida Uyghurlar mesilisi yene bir qétim eslep ötüldi hemde xitay kompartiyesining xongkongdiki siyasetlirige baghlandi.

Ijtima'iy taratqulardiki süretlerdin melum bolushiche, namayishchilar 1-iyul küni sheherlik hökümetning ish binasigha bésip kirip, binani igiliwalghan. Shu chaghda binaning ichki qismidiki tamgha “Xitay jezmen Uyghur musulmanlirigha yürgüzüwatqan jinayetlirining bedilini töleydu” dégen sözler chong qilip yézip qoyulghan.

Bu süret tarqalghandin kéyin zor bes-munazirige seweb bolghan. Amérikadiki jorji tawn uniwérsitétining proféssori, Uyghurshunas jéymis milward bu heqte pikir qilip “Shi ependi, kördingizmu? sizning shinjangdiki zulumliringiz ‛bir dölette ikki xil tüzüm bolush‚ nezeriyesini tarixning exlet sanduqigha chörüp tashlash kéreklikini téximu ochuq körsetti,” dégen.