Xongkongdiki namayishta körülgen saqchilarning zorawanliqi dunyaning diqqitini qozghimaqta

Muxbirimiz eziz
2019-08-13
Élxet
Pikir
Share
Print

Xongkongda barghanséri yuqiri pellige chiqiwatqan démokratiye namayishi jeryanida xitay hökümitining saqchilar arqiliq namayishchi ammigha zorawanliq qilishi dunyadiki her sahe kishilirining we teshkilatlirining jiddiy diqqitini qozghimaqta.

"Jenubiy xitay sehiri" gézitining 13-awghusttiki xewiride éytilishiche, birleshken döletler teshkilati (b d t) kishilik hoquq aliy kéngishining re'isi méshél bechélot bu heqte söz qilip, özining yéqindin buyan barghanséri yuqiri pellige chiqiwatqan saqchilarning zorawanliq qilmishliridin endishige chüshkenlikini bildürgen. Ular bu heqtiki tekshürüsh arqiliq "Xongkong saqchiliri ishletken yash aqquzush bombisi, saqchi kaltiki, rézinke oq we bashqa qorallar xelq'araliq qa'idiler boyiche men'i qilin'ghan nersilerdur" dep xulase chiqarghan.

Xongkongdiki namayishchi amma xongkong ayrodromining kütüsh zalini igiliwalghandin kéyin yüz nechche ayropilanning uchushi emeldin qaldurulghan. Kéyinche bu hal pütkül ayrodromning taqilip qélishigha seweb bolghan. "Xelq'ara soda waqti" gézitining bu heqtiki xewiride xitay xelq azadliq armiyesining shénjén shehiride topliniwatqanliqi éytilghan. Xitay axbaratida bolsa herbiylerning we bronéwiklarning toplinishini "Manéwir éhtiyaji üchün" dep chüshendürgen.

Xongkongdiki namayishta saqchilarning köplep zorawanliq wasitilirini ishqa sélishi hemde xitay azadliq armiyesining xongkongning arqa hoylisi bolghan shénjén'gha toplinishi nöwettiki weziyetning téximu éghir aqiwetlerge sewebchi bolushi heqqide köpligen muhakimilerge sorun hazirlimaqtiken.

Toluq bet