Xitay hökümiti kanada tashqi ishlar ministirini xongkong mesilisini tilgha alghanliqi üchün eyibligen

Xitay hökümiti kanada tashqi ishlar ministiri kristiya frilendning xongkonggha bergen bahasi seweblik uni qattiq eyibligen.

Kanadada chiqidighan “Yershari we pochta” torining 21-awghusttiki xewirige qarighanda, xitay tashqi ishlar ministirliqining bayanatchisi géng shu'ang 20-awghust küni bayanat élan qilip, “Kanada hökümitining xongkonggha bergen asassiz bahaliri qayta-qayta otturigha chiqmaqta. Ular bu arqiliq junggoning ichki ishlirigha éghir derijide arilashti,” dep kanada hökümitini tenqidligen. Géng shu'angning bu sözliri CCTV ning xewerler programmisidimu qoyulghan.

Melum bolushiche, kanada tashqi ishlar ministiri kristiya frilend 17-awghust küni yawropa ittipaqining tashqi siyasitige mes'ul xadimi fédérika mogérini bilen birlikte bir birleshme bayanat élan qilip, xitayning xongkong weziyitini “Qobul qilghili bolmaydighan zorawanliq weqesi” dégen bayanatigha qarshi bayanat bérip, xitayning xongkongluqlarning négizlik erkinlikini hörmet qilishqa chaqirghan.

CCTV Ning xewerler programmisida “Bu kristiya frilendning bu yil may éyidin buyanqi üchinchi qétim xongkong üchün awaz chiqirishidur. Junggo terep kanadani xongkong mesiliside hoshyar pozitsiyede bolushini telep qilidu,” déyilgen.

18-Awghust amérika prézidénti donald tramp xitay bilen élip bériliwatqan soda söhbiti heqqide söz qilip, “Eger ‛tiyen'enmén weqesi‚ ge oxshash zorawanliq qayta yüz berse, xitay bilen bolghan soda kélishimimiz axirlishidu,” dégen. Buninggha qarita xitay terepmu inkas bildürüp, “Eger amérika terep xongkong mesilisini izchil tilgha alsa, ular bilen bolghan soda munasiwitimiz buzulidu,” dégen.