Xongkong namayishining netijiside "Tutqunlarni ötküzüp bérish qanuni" emeldin qalduruldi

Muxbirimiz eziz
2019-09-04
Élxet
Pikir
Share
Print

Xongkong alahide rayonining bash ijra'iye emeldari kerriy lam 3-séntebir küni xongkong hökümitining jiddiy talash-tartish peyda qiliwatqan "Tutqunlarni ötküzüp bérish qanuni" heqqidiki teklip layihisini qayturuwalghanliqini jakarlidi. U bu heqtiki sözide "Xelqning rayini nezerge alghanliqimiz üchün bu qararni chiqarduq" dégen.

Chnn ning 4-awghusttiki xewiride éytilishiche, kerriy lam bu qararni "Xongkongdiki namayishta köngli azar yégen kishilerning qelbini birdinla éritip kételmisimu, xelq ammisini zorluqni emes, belki söhbetni tallashqa righbetlendüridu" dep qaraydighanliqini bildürgen. Emma namayishchilarning wekilliridin klawdiya maw bu qarar heqqide söz qilip "Bu bekla yétersiz, shundaqla tolimu kéchikken qarardur" dégen. Melum bolushiche, mezkur qanun layihesini bikar qilish telipi xongkongdiki namayishchi amma otturigha qoyghan besh türlük telepning biri iken. Nöwette qalghan töt türlük telep téxi jawabsiz halda turmaqta iken.

Amérika kéngesh palatasining ezasi marko rubyu bu munasiwet bilen 4-séntebir küni "Washin'gton pochtisi" gézitide mexsus maqale élan qilip "Xitayning heqiqiy mahiyiti xongkongda ashkara boldi" dep körsetti. Shundaqla xongkongda yüz bergen ishlarni "Xitayning ichki ishi" dep atashqa bolmaydighanliqini, bu mesililerning yalghuz xongkong xelqi bilenla ketmeydighanliqini, uning yene bu xelq'araliq sheherde yashawatqan 85 ming amérika puqrasini öz ichige alghan nechche yüz ming chet'ellik insanlarghimu chétilidighanliqini tekitlidi. Shundaqla bu weqelerni xitayning dunya körüp turuwatqan ehwalda pütün dunyani aldimaqchi bolghanliqining shundaqla 1984-yilila wede qilin'ghan xongkonggha "Bir dölette ikki xil tüzüm bolush" sheklide yüksek aptonomiye bérish wedisining buzulghanliqining delili ikenlikini bayan qildi.

Marko rubiyo maqaliside yene xitay hökümitining "Tyen'enmén qirghinchiliqi" ni basturushta qollinilghan xitay xelq azadliq armiyesini xongkongning "Arqa hoylisi" bolghan shénjén shehirige toplishi, shundaqla tinchliq namayishida "Térrorluq alametlirining körülgenliki" ni pesh qilishini eyiblep "Xitay rehberliri xongkongdiki aptonomiye we qanun arqiliq idare qilishqa hörmet qilishi lazim. Bolmisa buning qandaq malimanchiliqqa apiridighanliqini ular alliqachan yéterlik derijide kördi. Emdiki tallash ularning özige qaldi" dédi.

Toluq bet