Béyjing da'iriliri xongkongda dawamlishiwatqan démokratik namayishtin ensirimekte

Xongkongda dawamlishiwatqan démokratik namayish 7-öktebir küni 10-künige qedem qoydi. Xitay merkizi hökümiti we xongkong yerlik hökümitining telipi bilen oqughuchilar düshenbe küni xongkong hökümet binasida ishleydighanlar üchün yol échip bergen bolsimu, emma hökümet binasi etrapidiki meydan we yollarni igiligen oqughuchilar yenila namayishini dawamlashturmaqta.

Bügünki eng yéngi xewerlerdin melum bolushiche, 6-öktebir düshenbe küni kechte oqughuchilar xongkong da'irilirining oqughuchilar bilen söhbetlishish teklipini shertlik qobul qilip, da'irilerdin oqughuchilar otturigha qoyghan teleplerni orunlashqa ikki terep söhbitidin ilgiri wede bérishni telep qilghan.

Xongkongdiki démokratik saylam ötküzüshni telep qilish namayishi xitay merkizi hökümitini narazi qiliwatqan we qattiq ensiretken bolup, xelq géziti, merkizi téléwiziye istansisi qatarliq köpligen hökümet axbarat wasitiliride xongkong oqughuchilirining namayishi qattiq eyiblendi. Xitay teshwiqat wasitiliride yene, xongkongdiki oqughuchilar namayishini qollighan gherb démokratik döletliri “Junggoning ichki ishlirigha arilishishqa urundi” dep eyiblendi. Xongkong we xitay weziyitini közetküchiler nöwette, xitay merkizi hökümitining xongkongdiki démokratik namayishni qandaq bir terep qilishigha yéqindin diqqet qiliwatqan bolup, xongkong namayishi 1989-yili béyjingda yüz bergen tyen'enmén oqughuchilar herikitidin kéyinki yene bir qétimliq démokratiyini telep qilish herikiti dep teriplenmekte.