Xongkong parlaméntida chiqqan majirada 6 neper amanliq xadimi yarilan'ghan

Xongkong parlaméntining qesem murasimida kélip chiqqan we 3 heptidin béri dawamlishiwatqan detalash bügün majiragha aylan'ghan, majirada 6 neper amanliq xadimi yarilan'ghan.

Firansiye axbarat agéntliqining xewer qilishiche, xongkong parlaméntining bügünki yighini bashlinishtin bir minut burun, bu yighin zaligha kirishi waqtinche toxtitip qoyulghan parlamént ezasi bagi'o léng bilen yaw wa'iching yighin zaligha kirip kelgen. Bagi'o léng zalning aldidiki üstelge bir mikrofonni qoyup, parlaméntning qesemnamisini oqushqa bashlighan. Bu chaghda parlamént amanliq xadimliri, bu ikki neper parlamént ezasini yighindin chiqiriwétishke heriket qilghan؛ zaldiki bashqa démokratiye terepdarliri bolsa, ikki neper parlamént ezasini otturisigha éliwélip qoghdighan. Netijide ikki terep arisida majira yüz bérip 6 neper amanliq xadimi yarilan'ghan.

Weqedin kéyin parlamént bashliqi mezkur ikki parlamént ezasini “Bashqilarning bixeterliki bilen chatiqi bolmidi” dep eyibligen, qarshi terep bolsa, özlirige qoyulghan cheklimining majiragha sewebchi ikenlikini éytqan.

Bu ikki neper parlamént ezasi ötken ayda qesem murasimida xongkong junggo emes dégen pilakatni kötürgen we qesemnamini özgertip oqughanliqi üchün, ularning parlaménttiki ornining qanuniyliqi heqqide sotning hökümi kütülüwatqan idi.