Xongkong hökümiti xongkong musteqilliq partiyesige “Tedbir qollinimiz” dep tehdit saldi

Xongkong hökümiti yéngi qurulghan musteqilliq partiyesi - xongkong milliy partiyesige “Tedbir qollinimiz” dep tehdit salghan hem u partiyeni tizimgha élishni ret qilghan. Xongkong milliy partiyesi 50 tek xongkongluq studént we yash kespiy xadimlar teripidin düshenbe küni qurulghan idi.

U xongkong musteqilliqini özining siyasiy nishani, dep jakarlighan. Emma xongkong hökümiti peyshenbe küni mezkur partiyeni eyiblep, musteqilliq xongkong tüp qanunigha xilap, xongkongning muqimliqi we güllinishige buzghunchiliq qilidu, dégen.

U charshenbe küni élan qilghan bayanatida yene, “Xongkong alahide rayon memuriyiti qanunlargha asasen tedbir qollinidu,” dep körsetken. Emma xongkong milliy partiyesi peyshenbe küni xongkong da'irilirige reddiye bérip, “Xongkong musteqilliqini telep qilsaq jinayi jawabkarliqqa tartilidu, déyish bimenilik” dep tekitligen.

Mezkur partiye bayanatida yene, herqandaq kishi peqet musteqilliqni tilgha alghanliqi üchün jazagha tartilsa, “Asasiy qanun krizisi we siyasiy krizisi yüz bergenlik bolidu” dégen.

Lékin xitay dölet kabinéti xongkong da'irilirining milliy partiyeni tizimgha élishni ret qilghanliqini qollighan.

Shinxu'a agéntliqining xewer qilishiche, xitay dölet kabinétining xongkong-awmén ishlirini bashqurush ishxanisi musteqilliq chaqiriqigha “Qet'iy qarshi turidighanliqi” ni bildürüp, xongkong hökümitining herikitini “Toghra” dégen.

Xongkong milliy partiyesining peyshenbe küni firansiye agéntliqigha ashkarilishiche, u partiye özini bir shirket namida tizimgha aldurmaqchi bolghan, emma xongkong hökümiti ret qilghan.