Xongkong da'iriliri yéngi “Xewpsizlik qanuni” ni maqullidi

Washin'gtondin muxbirimiz eziz teyyarlidi
2024.03.19

19-Mart küni xongkong da'iriliri “Saylam” arqiliq yéngidin tüzüp chiqilghan “Xewpsizlik qanuni” ni toluq awaz bilen maqullidi. Buning bilen xongkongning xewpsizlik qanuni mezmun jehette chong quruqluqtiki xewpsizlik qanunigha téximu yéqinlashturuldi.

CNN Ning bu heqtiki xewiride éytilishiche, 200 bettin ashidighan bu yéngi qanunda xewpsizlik mesililiri boyiche “Jinayet” dep békitishke bolidighan ishlarning sani téximu köpeytilgen. Jümlidin “Xa'inliq”, “Jasusluq”, “Ichki ishlargha arilashqanliq” dep xaraktérlinidighan qilmishlarning da'irisi zor derijide kéngeytilgen. Buning bilen 2020-yili élan qilin'ghan “Xewpsizlik qanuni” téximu küchlük asasqa ige qilin'ghan. Xongkongning bash ijra'iye emeldari jon lé kachyu (John Lee Ka-chiu) bu heqte söz qilip: “Bu qanunning maqullinishi xongkong üchün bir tarixiy weqedur. Biz merkiziy hökümetning ümidini yerde qoymiduq” dégen.

Halbuki, her sahe kishiliri bu halning xongkongdiki démokratiyeni téximu ilgiriligen halda weyran qilishqa aktip xizmet qilidighanliqini bildürgen. Jorjtawn uniwérsitétining qanunshunasliq proféssori érik lay (Eric Lai) bu heqte söz qilip “Xongkong da'iriliri hazir bu yéngi qanun arqiliq xongkongdiki uchur erkinliki we pikir erkinlikini téximu qattiq boghushni közlewatidu” dégen.

En'gliye hökümiti 1997-yili xongkongni xitaygha qayturup bergende, xitay hökümiti “Bir dölette ikki xil tüzüm bolush haliti 50 yilghiche özgermeydu” dep wede bergen. Shundaqla buning heqiqiy menidiki aptonomiye boyiche idare qilinidighanliqini jakarlighan. Emma aridin 20 yilmu ötmestin xongkongdiki démokratiye we erkinlik basturulushqa bashlighan. Emdi bu yéngi qanunning maqullinishi bolsa xongkongdiki aptonomiyening axirqi qel'elirini weyran qilidu, dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.