Xitay hökümiti xongkonggha “Dölet xewpsizliki qanuni” ni tangmangtiken

Roytérs agéntliqining xewiridin qarighanda, peyshenbe küni xitay hökümiti xongkongni “Dölet xewpsizliki qanuni” ni emeliyleshtürüsh mesiliside agahlandurghan. Igilinishiche, mezkur qanunning xongkongning erkinlikni yenimu ilgirilep chekleydighanliqi mölcherlenmekte.

Xewerdin melum bolushiche, peyshenbe küni, xitay xelq qurultiyi qanun komitétining bashliqi li féy bu heqte toxtilip, xongkongdiki bu “Qanun boshluqi” ning choqum toldurulushi kéreklikini tekitligen we “Biz bu boshluqning ziyanliq netijilirini körüwatimiz,” dégen.

Xongkongda uniwérsitét oqughuchilirining xitay merkizi hökümitining xongkong démokratiyisi üstidiki tesirining zoriyishigha bolghan naraziliqi alahide közge körünüp kelgen idi. Yéqinqi yillardin buyan, joshuwa wang qatarliq oqughuchilar rehberliri bashchiliqida “Künlük herikiti” qatarliq démokratik namayishlar yüz berdi. Kéyin bu heriket tarqaqlashturulghan bolsimu, xongkongdiki aliy mekteplerde xitay hökümitige qarshi naraziliq heriketliri oxshash bolmighan usullarda ipadilinip keldi. Mesilen, xongkongda ötküzülgen musabiqilerde xitay dölet marshi orunlan'ghanda oqughuchilarning sho'ar towlash yaki tetür qariwélish arqiliq qarshiliq bildürüshi eng közge körünerlik ipadilerning biri bolup, mezkur weqe axbaratlarda keng xewer qilin'ghan idi.

Roytérs agntliqining bildürshiche, xitay qanun komitétining bashliqi li féy bir yérim sa'et dawam qilghan sözide, tigh uchini mushu weqelerge tegküzüp turup, “Ularning bu heriketliri tolimu chakina. U qanunsizluqni menbe qilghan. Biz bundaq heriketlerge qilchilikmu ikkilenmey qet'iy qarshi turushimiz kérek,” dégen.

Xitay téxi yéqinda dölet marshini mesxire qilghanlarni qanuniy jawabkarliqqa tartidighan bir qanunni maqullighan idi. Közetküchiler nöwette xitayning bu qanunni xongkongghiche kéngeytishi mumkinlikini perez qilishmaqta. Emma xongkong yerlik hökümiti “Xewpsizlik qanuni” ni hazirqidek nazuk bir shara'itta xongkonggha téngishi yaxshi aqiwet élip kelmeydu, dep agahlandurmaqtiken.