Béyjing xongkong parlamént ezalirining qesem bérish detalishigha arilashmaqchi

Béyjing xongkong parlaméntigha yéngi saylan'ghan 2 yash musteqilchi parlamént ezasining qesem bérish mesilisidiki siyasiy dewa-desturigha arilishidighanliqini bildürgen. Lékin béyjingning bu pilani xongkongda xongkongning aptonomiyisi, uning musteqil edliyesige xewp yetküzidu, dégen endishe qozghidi.

Birleshme agéntliqining xewer qilishiche, béyjing hökümiti xitay xelq qurultiyi da'imiy komitétining xongkong tüp qanunining qesem bérishke alaqidar maddilargha chüshenche bérishni muzakire qilidighanliqini bildürgen.

Xongkong waliy mehkimisining jüme küni bildürüshiche, béyjing hökümiti buni xongkong memuri da'irilirige resmiy uqturghan. Xongkong tüp qanunini chüshendürüsh hoquqi xitay xelq qurultiyi qolida bolup, bu öktichilerning izchil naraziliqini qozghap kelgen idi.

Bu yil yazda ötküzülgen xongkong parlamént saylimida 2 yash musteqilchi namzat lyang sungxéng bilen yo xuyjén parlamént ezaliqigha saylan'ghan. Ular ötken ay qesem bergende xongkongning xitay zémini ikenlikini ret qilghan. Shuning bilen ularning qesimi inawetsiz dep qarilip, ular xongkong sotigha erz qilghan idi.

Birleshme agéntliqining bildürüshiche, yo xuyjén, bu mesilige béyjingning arilishishini tenqidlep, ular “Siyaset arqiliq qanuni mesilisini hel qilmaqchi boluwatidu” dégen. Lyang sungxéng bolsa, béyjingning chüshendürüshi “Xongkongning qanuni sistémisi we qanun bilen bashqurulushigha ejellik zerbe béridu” dégen.