Xoten-chaqiliq tömüryolining cherchen bölikide ish bashlandi

Muxbirimiz eziz
2020-09-08
Élxet
Pikir
Share
Print

Xitay hökümitining Uyghurlar diyaridiki yéngi tömür yol liniyelirining biri bolghan xoten-charqiliq tömüryolining cherchen bölikide rélis yatquzush qurulushi 7-séntebirde bashlandi.

"Xitay xewerliri" torining 7-séntebirdiki xewiride éytilishiche, mezkur qurulushning omumiy uzunluqi 825 kilométir bolup, 22 milyard som (texminen üch milyard amérika dolliridin artuqraq) meblegh sélin'ghan. Mezkur bölek cherchen nahiyisidin kériye nahiyisigiche bolghan ariliqni öz ichige alidiken. Bu bölekning uzunluqi 535 kilométir bolup, 2022-yili qatnash bashlinidiken. Mezkur liniye biwasite gulmud-korla liniyesige ulinidighan bolup, qurulush pütkendin kéyin xitay ölkiliridin udulla Uyghurlar diyarining ottura qismigha bérishni ishqa ashuridiken.

Xewerde Uyghurlarning qatnash ishlirigha qulayliq élip kélish üchün xitay hökümitining bunche köp meblegh sélip tömür yol yasighanliqi gewdilendürülgen. Shundaqla buning "Bir belwagh bir yol qurulushi" üchünmu zor ehmiyetke ige ikenliki éytilghan. Mushu ehwalgha qarap bir qisim analizchilar buning xitay hökümiti ijra qiliwatqan Uyghurlar diyarini téximu qattiq kontrol qilishtiki nopus köchürüsh we bayliq yötkesh éhtiyajini közlewatqan qurulush ikenlikini algha süridur. Amérikadiki musteqil közetküchi élshat hesen bu toghrisida toxtilip "Xitay hökümiti yasighan her bir tömür yol liniyesi emeliyette Uyghur xelqining boynigha sélin'ghan bir sirtmaq. Ular mushu arqiliq özlirining sherqiy türkistanni üzül-késil xitay mustemlikisige aylandurush niyitini emelge ashurushqa tirishmaqta" dédi.

Toluq bet