Xoten bilen chongching otturisida hawa yoli qatnishi yolgha qoyuldi

Muxbirimiz erkin
2019-06-21
Share

Teklimakanning jenubini xitayning chongching shehiri bilen tömür yol arqiliq tutashturush qurulushi jiddiy élip bériliwatqan bir waqitta, bu ikki rayon yene hawa yoli arqiliq tutashturulghan. Xitay taratqulirining xewer qilishiche, bu yil 2‏-iyuldin bashlap, xoten-chongching otturisida ayropilan qatnaydiken. Eger nöwette jiddiy élip bériliwatqan xoten-chaqiliq tömür yoli pütüp resmiy qatnash bashlansa, Uyghurlar mutleq köp sanliqni igileydighan teklimakanning jenubidiki xoten qatarliq yurtlar xitayning gherbiy jenubidiki ölkilerge hawa, tömür yol arqiliq pütünley échiwétilidu.

Nöwette xitay hökümiti 22 milyard yüen meblegh sélip, 825 kilométir uzunluqtiki xoten-chaqiliq tömür yol qurulushini jiddiy élip barmaqta. Bu qurulush pütse xoten we chaqiliq nahiyisi korla-golmut tömür yoli bilen tutishidu. Xitay hökümiti hawa yoli qatnishi xotenning tereqqiyatini algha süridighanliqini ilgiri sürsimu, lékin bu Uyghur teshkilatlirini izchil endishige sélip keldi. Ularning qarishiche, bu rayon xitayning gherbiy-jenubi bilen biwasite tutashturulsa, bu, mezkur rayonning nopus qurulmisi, muhiti, Uyghurlarning medeniyiti, turmush usuligha qattiq tesir qilidiken. 

Bu hawa yolining xitay hökümiti 2 milyondek Uyghur qatarliq milletlerni yighiwélish lagérlirigha qamap, Uyghur jem'iyitige qarita omumyüzlük teqibleshni yolgha qoyghan bir mezgilde échilishi diqqet qozghimaqta. Xitayning 2017‏-yili 2‏-ayda bashlan'ghan bu herikitide xoten asasliq zerbe bérish nishanlirining biri bolghan bolupla qalmay, yene bu rayon xitay hökümitining ichkiri ölkilerni köplep xizmetchi xadim qobul qilip, köchmen yötkeydighan asasliq rayonlirining birige aylan'ghanidi. 

Shinxu'a torining xewiride körsitilishiche, chongching-xoten hawa qatnishining otturisida omumi uchush musapisi 4 sa'et 45 minut bolup, ayropilan her heptining 2, 4 we 6 ‏-künliri qatnaydiken. Bélet bahasimu töwen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet