Xoten tarixiy medeniyet körgezme buyumliri “Xitay muzéyliridiki on chong körgezme ser xil buyumliri mukapati” gha érishken

Xitay taratqulirining xewirige qarighanda, 18-may küni xoten wilayetlik muzéyning “Sherqtin chiqti besh yultuz-xoten tarixiy medeniyet buyumliri körgezmisi” xitayning 18-nöwetlik ( 2020-yilliq) “On chong körgezme ser xil buyumliri mukapati” gha érishken bolup, bu Uyghur rayonining muzéychiliq sahesi qolgha keltürgen tunji “Shan-sherep” hésablinidiken.

Xoten muzéyigha qoyulghan medeniyet buyumliri “Heywetlik ku'inlun téghida eks etken xu'ashya (rohi)”, “Milletler ittipaqliqi ussuli”, “Qashtéshi yurtida pilichilikni güllendürüsh”, “Jungxu'a a'iliside xoten bar” dégen témilar astida körgezme qilin'ghan bolup, 1300 dane asare-etiqe, 300 parchidin artuq süret, 32 parche xerite, 18 qisim widiyoluq léksiye, 4 qisim qisqa filim körgezmige qoyulghan.

Xewerde éytilishiche, “Bu körgezmide xoten tarixi we xoten medeniyiti xitay tarixining chong ramkisi ichide köp qatlam boyiche toluq körgezme qilin'ghan bolup, 2020-yil 18-may künidin bügün'giche 140 ming ziyaretchi kütüwélin'ghan”. Xoten medeniyet-tenterbiye, radiyo-téléwiziye idarisining bashliqi jang xu'ajé mundaq dégen: “Bu körgezmining meqsiti xoten hékayilirini sözlesh, yerlik medeniyetni gewdilendürüsh, xotenning tarixini, ademlerning turmushini, köp menbelik medeniyetni, tarixta merkiziy hakimiyetning xotenni qandaq ünümlük bashqurghanliqini körsitish”.

Közetküchilerning bildürüshiche, xitay hökümiti Uyghur rayonidiki muzéylarni xéli burunla “Jungxu'a medeniyiti teshwiqati orni” gha aylandurghan bolup, “Shinjang xitayning ayrilmas bir qismi”, “Jungxu'a milletliri ezeldin bir a'ile” dégen idiyeni merkez qilip körgezme ötküzidu. Xitay bu qétim xoten muzéyini muhim teshwiqat bazisigha aylandurghan bolup, uninggha qoyulghan eserlerge xitay medeniyiti amillirini singdürüshke alahide küch serp qilghan we uni mukapatlash arqiliq bu xil teshwiqat pa'aliyitige ilham bergen.