Хотән тарихий мәдәнийәт көргәзмә буюмлири "хитай музейлиридики он чоң көргәзмә сәр хил буюмлири мукапати" ға еришкән

Мухбиримиз җәвлан
2021-05-18
Share

Хитай таратқулириниң хәвиригә қариғанда, 18-май күни хотән вилайәтлик музейниң "шәрқтин чиқти бәш юлтуз-хотән тарихий мәдәнийәт буюмлири көргәзмиси" хитайниң 18-нөвәтлик ( 2020-йиллиқ) "он чоң көргәзмә сәр хил буюмлири мукапати" ға еришкән болуп, бу уйғур райониниң музейчилиқ саһәси қолға кәлтүргән тунҗи "шан-шәрәп" һесаблинидикән.

Хотән музейиға қоюлған мәдәнийәт буюмлири "һәйвәтлик куинлун теғида әкс әткән хуашя (роһи)", "милләтләр иттипақлиқи уссули", "қаштеши юртида пиличиликни гүлләндүрүш", "җуңхуа аилисидә хотән бар" дегән темилар астида көргәзмә қилинған болуп, 1300 данә асарә-әтиқә, 300 парчидин артуқ сүрәт, 32 парчә хәритә, 18 қисим видийолуқ лексийә, 4 қисим қисқа филим көргәзмигә қоюлған.

Хәвәрдә ейтилишичә, "бу көргәзмидә хотән тарихи вә хотән мәдәнийити хитай тарихиниң чоң рамкиси ичидә көп қатлам бойичә толуқ көргәзмә қилинған болуп, 2020-йил 18-май күнидин бүгүнгичә 140 миң зиярәтчи күтүвелинған". Хотән мәдәнийәт-тәнтәрбийә, радийо-телевизийә идарисиниң башлиқи җаң хуаҗе мундақ дегән: "бу көргәзминиң мәқсити хотән һекайилирини сөзләш, йәрлик мәдәнийәтни гәвдиләндүрүш, хотәнниң тарихини, адәмләрниң турмушини, көп мәнбәлик мәдәнийәтни, тарихта мәркизий һакимийәтниң хотәнни қандақ үнүмлүк башқурғанлиқини көрситиш".

Көзәткүчиләрниң билдүрүшичә, хитай һөкүмити уйғур районидики музейларни хели бурунла "җуңхуа мәдәнийити тәшвиқати орни" ға айландурған болуп, "шинҗаң хитайниң айрилмас бир қисми", "җуңхуа милләтлири әзәлдин бир аилә" дегән идийәни мәркәз қилип көргәзмә өткүзиду. Хитай бу қетим хотән музейини муһим тәшвиқат базисиға айландурған болуп, униңға қоюлған әсәрләргә хитай мәдәнийити амиллирини сиңдүрүшкә алаһидә күч сәрп қилған вә уни мукапатлаш арқилиқ бу хил тәшвиқат паалийитигә илһам бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт