Америка “хуавей” ширкити һәққидә топлиған мәхпий учурлирини сотта дәлил орнида ишлитидикән

Америка әдлийә тармақлири хитай технологийә ширкити хуавей һәққидә топлиған мәхпий учурлирини сотта дәлил орнида ишлитидиғанлиқини билдүргән.

Нөвәттә хитайниң мәзкур технологийә ширкити америка әдлийә министирлиқи тәрипидин ембарго қануниға хилаплиқ қилиш вә доллар оборотида сахтипәзлик қилиш билән әйибләнмәктә. Ройтерс агентлиқиниң хәвәр қилишичә, американиң ярдәмчи әдлийә министири алекис соломон 4‏-апрел ню-йорк шәһириниң бруклин районлуқ федерал сот мәһкимисидә ечилған сотта америка истихбарат органлириниң топлиған мәхпий учурлирини дәлил орнида ишлитидиғанлиқини билдүргән. Лекин соломон өзлириниң хуавей һәққидә қандақ мәхпий истихбарат учурлириға еришкәнликини ашкарилимиған. Униң тәкитлишичә, америка ташқий истихбарат тәһқиқләш қануни улар тәминлигән дәлилләрниң мәхпий тутулушини тәләп қилидикән.

Мәлум болушичә, һөкүмәт пәйшәнбә күни хуавей ширкитигә өзлириниң бу пиланини уқтуруп, бу учурларға “електронлуқ тәқибләш вә вуҗуд тәкшүрүши арқилиқ еришкәнлики” ни билдүргән. Америка һөкүмити хуавейниң җасуслуқ билән шуғуллинишидин изчил әндишә қилип кәлгән. Бруклиндики федерал сотта хуавей ширкити вә униң муавин мудири, қошумчә баш боғалтири миң вәнҗо хуавейниң иран техника ширкити скайком билән болған мунасивитини ялған мәлум қилип, HSBC вә башқа банкиларни алдаш билән әйибләнгән.

Миң вәнҗо өткән йили канаданиң ванковер шәһиридә қолға елинған. Ройтерс агентлиқи өткән айда америка даирилириниң мәзкур ширкәтниң директорлириниң електронлуқ алақә әсваблирини тәқиб қилиш арқилиқ униң паалийитигә даир мәхпий учурларни топлиғанлиқини билдүргән иди. Нөвәттә хитай һөкүмити униң америкаға өткүзүп берилишигә қаттиқ қарши чиқмақта.

Көзәткүчиләрниң қаришичә, бейҗиң әгәр миң вәнҗо америкиға өткүзүп берилсә, хуа вей ширкитиниң һөкүмәт билән болған алақисиға даир нурғун мәхпийәтликләрниң ашкарилинип кетишидин әндишә қилидикән.