Amérika “Xu'awéy” shirkiti heqqide toplighan mexpiy uchurlirini sotta delil ornida ishlitidiken

Amérika edliye tarmaqliri xitay téxnologiye shirkiti xu'awéy heqqide toplighan mexpiy uchurlirini sotta delil ornida ishlitidighanliqini bildürgen.

Nöwette xitayning mezkur téxnologiye shirkiti amérika edliye ministirliqi teripidin émbargo qanunigha xilapliq qilish we dollar oborotida saxtipezlik qilish bilen eyiblenmekte. Roytérs agéntliqining xewer qilishiche, amérikaning yardemchi edliye ministiri alékis solomon 4‏-aprél nyu-york shehirining bruklin rayonluq fédéral sot mehkimiside échilghan sotta amérika istixbarat organlirining toplighan mexpiy uchurlirini delil ornida ishlitidighanliqini bildürgen. Lékin solomon özlirining xu'awéy heqqide qandaq mexpiy istixbarat uchurlirigha érishkenlikini ashkarilimighan. Uning tekitlishiche, amérika tashqiy istixbarat tehqiqlesh qanuni ular teminligen delillerning mexpiy tutulushini telep qilidiken.

Melum bolushiche, hökümet peyshenbe küni xu'awéy shirkitige özlirining bu pilanini uqturup, bu uchurlargha “Éléktronluq teqiblesh we wujud tekshürüshi arqiliq érishkenliki” ni bildürgen. Amérika hökümiti xu'awéyning jasusluq bilen shughullinishidin izchil endishe qilip kelgen. Bruklindiki fédéral sotta xu'awéy shirkiti we uning mu'awin mudiri, qoshumche bash boghaltiri ming wenjo xu'awéyning iran téxnika shirkiti skaykom bilen bolghan munasiwitini yalghan melum qilip, HSBC we bashqa bankilarni aldash bilen eyiblen'gen.

Ming wenjo ötken yili kanadaning wankowér shehiride qolgha élin'ghan. Roytérs agéntliqi ötken ayda amérika da'irilirining mezkur shirketning diréktorlirining éléktronluq alaqe eswablirini teqib qilish arqiliq uning pa'aliyitige da'ir mexpiy uchurlarni toplighanliqini bildürgen idi. Nöwette xitay hökümiti uning amérikagha ötküzüp bérilishige qattiq qarshi chiqmaqta.

Közetküchilerning qarishiche, béyjing eger ming wenjo amérikigha ötküzüp bérilse, xu'a wéy shirkitining hökümet bilen bolghan alaqisigha da'ir nurghun mexpiyetliklerning ashkarilinip kétishidin endishe qilidiken.