Америка һөкүмити хитайниң хуавей ширкитигә қарита йәниму илгириләп чәклимә қойди

Мухбиримиз әркин
2020-08-17
Share

Америка сода министирлиқи хитайниң хуавей ширкитигә қарита йәниму илгириләп чәклимә қоюп, униң америка техникиси билән башқа дөләтләрдә ишләпчиқирилған өзәкләргә еришишини мәни қилди.

Америка сода министирлиқи санаәт бихәтәрлик идарисиниң 17-авғуст елан қилған баянатида тәкитлишичә, улар йәнә хуавей ширкитигә четишлиқ 38 ширкәтни "қара тизимлик" кә алған. Америка сода министирлиқиниң билдүрүшичә, чәтәл ширкәтлириниң америка техникисида ишләпчиқирилған өзәкни хуавейға сетиши үчүн американиң алаһидә рухситини елиши керәк икән.

Америка һөкүмити өткән йили хуавейни "қара тизимлик" кә киргүзүп, америка ширкәтлириниң униңға америка техникиси сетишини чәклигән болсиму, лекин уни өзәк билән тәминләшни қәрәллик узартип кәлгән. Америка сода министирлиқиниң баянатида тәкитлишичә, бу қетим улар қәрәллик узартишни тохтатқан. Көзәткүчиләр буниң хуавей үчүн еғир зәрбә икәнликини билдүрмәктә. Хитайниң мәзкур технологийә ширкити американиң бихәтәрликигә тәһдит селипла қалмай, хитайниң һөкүмитиниң уйғур диярида мусулманларни тәқиплишигә техникилиқ ярдәм бериш биләнму әйиблинип кәлгән.

Америка ташқи ишлар министирлиқи 17-авғуст баянат елан қилип, сода министирлиқиниң қарарини қоллайдиғанлиқини билдүрди. Ташқи ишлар министири майк помпейо трамп һөкүмитиниң "американиң дөләт хәвпсизлики, пуқралириниң шәхси мәхпийәтлики вә 5г ул әслиһәлириниң бир пүтүнлүкини қоғдаш" үчүн тәдбир алғанлиқини тәкитләп: "биз хитай компартийәсиниң пуқралиримизниң шәхсий мәхпийәтлики, америка ширкәтлириниң әқлий мүлүклири, кейинки әвлад дуня ториниң бир пүтүнлүкигә бузғунчилиқ қилишиға йол қоймаймиз," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт