Amérika hökümiti xitayning xu'awéy shirkitige qarita yenimu ilgirilep cheklime qoydi

Muxbirimiz erkin
2020-08-17
Élxet
Pikir
Share
Print

Amérika soda ministirliqi xitayning xu'awéy shirkitige qarita yenimu ilgirilep cheklime qoyup, uning amérika téxnikisi bilen bashqa döletlerde ishlepchiqirilghan özeklerge érishishini men'i qildi.

Amérika soda ministirliqi sana'et bixeterlik idarisining 17-awghust élan qilghan bayanatida tekitlishiche, ular yene xu'awéy shirkitige chétishliq 38 shirketni "Qara tizimlik" ke alghan. Amérika soda ministirliqining bildürüshiche, chet'el shirketlirining amérika téxnikisida ishlepchiqirilghan özekni xu'awéygha sétishi üchün amérikaning alahide ruxsitini élishi kérek iken.

Amérika hökümiti ötken yili xu'awéyni "Qara tizimlik" ke kirgüzüp, amérika shirketlirining uninggha amérika téxnikisi sétishini chekligen bolsimu, lékin uni özek bilen teminleshni qerellik uzartip kelgen. Amérika soda ministirliqining bayanatida tekitlishiche, bu qétim ular qerellik uzartishni toxtatqan. Közetküchiler buning xu'awéy üchün éghir zerbe ikenlikini bildürmekte. Xitayning mezkur téxnologiye shirkiti amérikaning bixeterlikige tehdit sélipla qalmay, xitayning hökümitining Uyghur diyarida musulmanlarni teqiplishige téxnikiliq yardem bérish bilenmu eyiblinip kelgen.

Amérika tashqi ishlar ministirliqi 17-awghust bayanat élan qilip, soda ministirliqining qararini qollaydighanliqini bildürdi. Tashqi ishlar ministiri mayk pompéyo tramp hökümitining "Amérikaning dölet xewpsizliki, puqralirining shexsi mexpiyetliki we 5g ul eslihelirining bir pütünlükini qoghdash" üchün tedbir alghanliqini tekitlep: "Biz xitay kompartiyesining puqralirimizning shexsiy mexpiyetliki, amérika shirketlirining eqliy mülükliri, kéyinki ewlad dunya torining bir pütünlükige buzghunchiliq qilishigha yol qoymaymiz," dégen.

Toluq bet