Хитайниң янфон әп базарлириға қаритилған чәклимиләрни күчәйткәнлики мәлум

Хитай интернет даирилириниң йеңи қаидиләрни чиқирип, хитай ичидики янфон әп базарлириға қаритилған чәклимиләрни күчәйткәнлики мәлум.

“җәнубий хитай сәһәр гезити” ниң хәвәр қилишичә, хитайниң тор башқуруш органлири, янфон әп базирида юмтал сатидиған ширкәт яки шәхсләрдин херидарларни өз исми билән тизимлитиш түзүмни қоллиниш вә херидарларниң һәрикәт хатирисини 60 күнгичә сақлашни тәләп қилған.

Хәвәрдә көрситишичә, хитай интернетни мәмурий башқуруш идариси чиқарған мәзкур бәлгилимә, һөкүмәт даирилирини әп базири абунтлириниң шәхсий учурлирини зиядә тизгинләш һоқуқиға игә қилидикән.

Мәлум болушичә, бу бәлгилимә бу йил 1-авғусттин башлап йолға қоюлидикән.

Мәзкур бәлгилимидә хитайдики янфон әплирини ишләткүчиләрниң янфон иҗтимаий алақисидә ләқәм яки тәхәллусларни қоллинишиға йол қоюлған болсиму, әмма уларниң әп сетивалғанда, яки йүклигәндә чоқум өзиниң кимликтики исимни ишлитиши шәрт қилинған.

Хәвәрдә нәқил қилишичә, гуаңҗудики бир янфон әп тәминлигүчиси мәзкур бәлгилиминиң “абунтларни сиясий, иҗтимаий темилардики сәзгүр пикирләрни йезиштин чәкләшни мәқсәт қилидиған” лиқини билдүргән. У йәнә: “бу қаидиләр пикир әркинликини техиму боғиду” дегән.

Хитай даирилири өткән йили февралдин башлап интернет қолланғучилирини һәқиқий исми билән тизимлитишқа мәҗбурлиған болса, бу йил майдин етибарән телефонларниму кимлик бойичә тизимлашни күчәйтидиғанлиқини елан қилған иди.