Xitay saqchiliri eqilliq téléfonlar arqiliq yüz bergen namayishlarni toxtitishqa urunmaqtiken

Muxbirimiz irade
2022.12.01

Ürümchide 24- noyabir küni yüz bergen ot apitide yuqum qamali sewebidin öyliridin chiqip kételmigen Uyghurlarning paji'elik halda ölüp kétishi ürümchi, béyjing, shangxey, wuxen, lenju qatarliq nurghun ölkilerde xitaylarning yuqum qamal tedbirlirige qarshi naraziliq namayishi qilishigha ot piltisi bolup bergenidi. Bu namayishlarda hetta xitay kompartiyesi we shi jinpinggha qarshi sho'arlar towlan'ghan.

Nöwette xitay da'irilirining bundaq namayishlarning dawamliq yüz bérishining aldini élish üchün köpligen saqchi we herbiy küchini ishqa séliwatqanliqi melum. Ijtima'iy taratqulardiki körünüshlerde namayish yüz bergen sheherlerdiki kochilarni saqchi aptomobillirining charlawatqanliqi, nurghunlighan formiliq saqchilarning kocha – koylarda boy körsitip heywe qiliwatqanliqi ashkarilanmaqta. Gu'angdung ölkisige a'it yene bir körünüshte bolsa herbiy aptomobillarning ahaliler rayonlirida yangratqu arqiliq “Ahalilerni öydin chiqmasliqqa, qalaymiqanchiliq chiqarmasliqqa, eksi teqdirde aqiwitining éghir bolidighanliqi” heqqide agahlanduruwatqanliqi körülgen.

Gérmaniye awazi we b b s qatarliq xewer organlirining xewer qilishiche, hazir xitay da'iriliri eqilliq téléfonlar arqiliq namayishchilarni qorqutup ularning qayta yighilishining aldini almaqtiken. Béyjing, shangxeydiki namayishqa qatnashqanlarning bu xewer organlirigha inkas qilishiche, saqchilar hazir kochilarda xalighan kishini toxtitip, ularning yanfonlirini tekshürüp téléfonliridiki tiwittér, télégram qatarliq alaqe eplirini öchürmektiken. Bundaq weqe ikki kün awwal shangxey yer asti poyizida yüz bergen. Saqchilar yoluchilarning yanfonlirini birmu – bir tekshürgen. Bir qisim kishiler saqchixanilargha chaqirtilghan. Yene beziler saqchilardin tehdit téléfonliri tapshuruwalghan. Saqchilar hetta namayishchilarning yanfonlirini musadire qilghan.

Xewerde bayan qilinishiche, xitay saqchi da'iriliri eqilliq téléfonlarning jughrapiyelik orunni belgilesh iqtidari arqiliq melum kishining namayish yüz bergen sa'ette qeyerdilikini éniqlap chiqqandin kéyin uni yuqiriqidek usullar bilen tehdit qiliwatqan bolushi mumkinken. Amérikadiki gordon chang qatarliq xitay ishliri közetküchiliri tiwittérdiki inkaslirida yuqirida déyilgen tedbirlerning Uyghur élide 2014- yilidin bashlap yolgha qoyulghanliqi, xitay hökümitining eqliy télifonlar arqiliq Uyghurlarni nazaret qilip, ular heqqide köplep uchur yighip andin ularni yighiwélish lagérigha qoyghanliqini eskertip, “Uyghurlarning béshigha kelgen külpet emdi xitaylarningmu béshigha keldi” déyishmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.