“Toshiba” qatarliq yaponiye shirketliri xitaydin chékinip chiqmaqtiken

Xitay iqtisadining yéqindin buyan chékinishke yüzliniwatqanliqi heqqidiki xewerler otturigha chiqiwatqanda “Toshiba” we “Oki” qatarliq yaponiye shirketlirining pat arida omumiyyüzlük xitay baziridin chékinip chiqidighanliqi melum bolmaqta.

TFIGlobal Xewerliri torining bu heqtiki melumatlirida éytilishiche, yaponiye éliktir üsküniliri sana'itidiki gigantlardin bolghan “Toshiba” shirkiti özliri 30 yil mewjut bolghan xitay baziridin chékinip chiqidighanliqini jakarlighan.

‍Ularning daliyen shehridiki zawuti bu yil séntebirning axiri taqilidighan bolup, ularning yéqin kelgüside xitayda qayta zawut quridighanliqi heqqide héchqandaq uchur yoq iken. Shirketning bu heqtiki bayanatida: “Shirket qurulmisidiki özgirishler hemde mehsulatlarni teminlesh halqiliridiki mesililer tüpeylidin biz bu qararni élishqa mejbur bolduq” déylgen.

Melum bolushiche, eyni waqitta daliyen shehrining bashliqi bolup xizmet qilghan bo shiley 1991-yili “Toshiba” shirkitining daliyen shehride ish bashlishigha zor küch serp qilghan iken.

Yaponiyediki a'ile éliktir üsküniliri sana'iti bilen shughullinidighan “‍Oki” shirkitimu mushuninggha oxshap kétidighan qarar alghan hemde özlirining zawutlirini shénjén shehridin taylandqa yötkeydighanliqini bildürgen. Xewerde éytilishiche, 2020-yilining otturisida yaponiye hökümiti yaponiye shirketlirini xitaydin chékinip chiqishgha kéreklik bolghan ikki milyard amérika dolliriliq köchüsh meblighi bilen temin etken. Hazirghiche bu mebleghni alghan shirketlerdin 30 shirket xitaydin sherqiy-jenubiy asiya ellirige köchken. Yene 57 shirket bolsa yaponiyege qaytip kelgen.

Melum bolushiche, bu hal yaponiyening sabiq bash weziri shénzo abéning xitayni iqtisadiy jehettin qismaqqa élish istratégiyesining dawamlishishi, dep qaralmaqta iken. Amérika hökümitimu Uyghur qirghinchiliqi heqqidiki qararni élan qilghandin kéyin amérika shirketlirini xitaydin sherqiy jenubiy asiya yaki latin amérika teweside köchüshke righbetlendürüp kelgen idi.