Yaponiyening sahibxanliqida xelq'ara déngiz armiye maniwéri ötküzülgen

Roytérs agéntliqining 6-noyabirdiki xewiride éytilishiche, sherqiy asiya rayonidiki weziyet jiddiylishiwatqan bir peytte, yaponiye yéqinda 12 döletning déngiz armiyesi ishtirak qilghan bir qétimliq xelq'ara déngiz armiye maniwérigha sahibxanliq qilghan. Tokyo shehrige yéqin bolghan sagami qoltuqida ötküzülgen bu maniwérda amérika, jenubiy koriye, awstraliye, sin'gapor, hindistan qatarliq döletlerning urush ayrupilanliri, awiyamatkilar, hujumchi paraxotlar we tik uchar qatarliqlar ishlitilgen.

Xewerde éytilishiche, bu qétimliq herbiy maniwér shimaliy koriyening bashqurilidighan bombilarni qoyup bérishi ewj éliwatqan hemde xitayning teywen'ge popuza qilishi yuquri pellige chiqiwatqan bir peytke toghra kelgen hemde herqaysi döletlerning yéngi bir qétimliq ittipaqliqi namayen qilin'ghan. Yaponiye bash weziri fumi'o kishida (Fumio Kishida) bu heqte söz qilip: “Biz zomigerlerge we bashqilarning tinchliqini buzghuchilargha qarshi her waqit teyyar turushimiz lazim” dégen.

Xewerde éytili'ishiche, kishida hökümiti yaponiyening dölet mudapiye xirajitini ikki pirsent östürüshni telep qiliwatqan bolup, bu arqiliq yaponiyening dölet mudapiye iqtidarini ashurush lazimliqini tekitlewatqan iken. Bu qétimqi birleshme maniwérgha jenubiy koriyeningmu qatnishishi, nöwette ularning ortaq bir reqibke duch kéliwatqanliqining ipadisi, dep qaralghan. Chünki bu xildiki maniwérlar ilgirimu ötküzülgen bolup, jenubiy koriye ularning hemmiside ret qilin'ghan iken.