Японийә вә австралийә һөкүмәтлири уйғурлар мәсилисидики ‍әндишилирини ипадилигә

Мухбиримиз әзиз
2021-06-10
Share

Америка башчилиқидики бир қисим ғәрб дөләтлири хитай һөкүмитиниң уйғур дияридики бастуруш қилмишини "ирқий қирғинчилиқ" дәп елан қилғандин кейин буниңға аваз қошидиғанлар барғансери көпийишкә башлиди. японийә вә австралийә һөкүмәтлириму йеқиндин буян өзлириниң бу мәсилидики "еғир әндишилири" ни ашкара ипадиләшкә башлиди. 

Ройтерс агентлиқиниң 9-июндики хәвиридә ейтилишичә, австралийә вә японийә һөкүмәтлириниң ташқий ишлар вә дөләт мудапийә министирлири шу күндики видейо сөһбитидин кейин бирләшмә баянат елан қилған. Баянатта ениқ қилип: "биз шинҗаңдики уйғурлар дуч келиватқан кишилик һоқуқ дәпсәндичиликидин бәкму қаттиқ әндишә қиливатимиз. Шундақла хитай һөкүмитини бирләшкән дөләтләр тәшкилати вә башқа хәлқаралиқ тәшкилатларниң мустәқил тәкшүрүш гурупписиға чәклимисиз тәкшүрүш һоқуқи беришкә чақиримиз," дейилгән. 

Бейҗиң да‍ирилири тездин буниңға инкас қайтуруп, буниң "хитай тәһдити" тиятериниң қайтидин ойнилиши икәнликини тәкитлигән. Болупму хитай ташқий ишлар министирлиқиниң баянатчиси ваң венбин буни "бизниң ичкий ишимизға қопаллиқ билән арилашқанлиқ," дегән. 

Һалбуки, австралийә ташқий ишлар министири марисә пайне ханим бу йил март ейида елан қилинған австралийә-йеңи залландийә һөкүмәтлириниң бирләшмә баянатида алиқачан бу мәсилини бир қетим тәкитлигән. Баянатта: "2018-йилидин буян шинҗаңда тез сүрәттә кеңийиватқан лагерлар һәмдә кишилик һоқуқ дәпсәндичилики бизни биарам қилмақта," дегән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт