Японийә карханилири мал тәминләш линийәсидики кишилик һоқуқ дәпсәндичиликини қайтидин тәкшүридикән
Көплигән ғәрб дөләтлири мәҗбурий әмгәк мәсилиси түпәйлидин хитай ширкәтлиригә җаза йүргүзүватқан әһвалда японийә карханилириму хәлқараниң бесимиға учраватқан болуп, бу карханилардин кишилик һоқуқ дәпсәндичиликигә четишлиқ еғир мәсилиләрни из қоғлап тәкшүрүш вә ашкарилаш тәләп қилинған.
-
Мухбиримиз җәвлан
2021-05-05 -
-
-
Көплигән ғәрб дөләтлири мәҗбурий әмгәк мәсилиси түпәйлидин хитай ширкәтлиригә җаза йүргүзүватқан әһвалда японийә карханилириму хәлқараниң бесимиға учраватқан болуп, бу карханилардин кишилик һоқуқ дәпсәндичиликигә четишлиқ еғир мәсилиләрни из қоғлап тәкшүрүш вә ашкарилаш тәләп қилинған. Әгәр карханиларда, мал тәминлигүчи ширкәтләрдә яки һөддә алғучи завутларда кишилик һоқуқ дәпсәндичилики қилмиши йүз бәрсә бундақ карханиларниң хәлқарада инавити төкүлүпла қалмастин, әрз-шикайәт вә қаршилиқларға дуч келидикән.
“японийә хәвәрлири” ториниң 5-апрел бәргән хәвиридә ейтилишичә, хитайниң уйғурларни әрзан баһалиқ қул орнида ишлитиши мәсилиси хәлқарада кишилик һоқуқ мәсилисигә көңүл бөлүш долқуни қозғиған. Бу хил дуняви йүзлинишкә әгишип, японийә һөкүмитиму бир һәрикәт пилани қоллинип, японийә карханилирини кишилик һоқуқ әһвалиға диққәт қилишни тәләп қилған. Келәр айда японийә йәнә “түзитилгән ширкәт башқуруш низами” ға бир маддини, йәни пай чеки базарға селинидиған ширкәтләргә аит кишилик һоқуқ маддисини қошидикән.
2020-Йил 3-айда австралийә истратегийәлик сиясәт тәтқиқат мәркизи елан қилған доклатта, уйғурларни қул орнида ишләткән завутларға четишлиқ карханилар ичидә японийәниң 14 ширкити барлиқи мәлум болғаниди.