Yaponiye xitaydin puqralirining parakendichilik téléfonlirini toxtitishini telep qilghan

Yaponiye, fukushima yadro istansisidin su qoyup bérishtin kéyin, xitay puqralirining yaponiyediki dukan we orunlargha téléfon qilip, parakendichilik sélishigha qarita xitaygha naraziliq bildürgen. Yaponiye da'irilirining 28-awghust bildürüshiche, yaponiyening fukushima yadro istansisi tinch okyan'gha radi'aktipliq su qoyup bergendin kéyin, yaponiye xitaydin kelgen parakendichilik xaraktéridiki nurghun “Epsuslinarliq” téléfonlarni tapshuruwalghan. Buninggha qarita yaponiye xitaygha resmiy naraziliq bildürgen. Yaponiye ötken peyshenbe küni radi'aktipliq su qoyup bérishni bashlap, fukushima yadro istansisini ishlepchiqirishtin toxtitishning achquchluq qedimini basqan.

Fukushima yadro istansisi 2011-yili déngiz shawqunining hujumigha uchrap, buningdin 25 yil awwal yüz bergen sabiq sowét ittipaqining chérnobil yadro istansisi weqesidin buyanqi eng chong yadro radi'atsiyesining chiqip kétish weqesi yüz bergenidi.

Roytérs agéntliqining xewer qilishiche, yaponiye kabinét bash katipi xirikazo matsuno, yaponiyening xitaydin urulghan nurghun téléfonlarni tapshuruwalghanliqini bildürüp: “Bu tereqqiyat kishini bek epsuslanduridu, shundaqla biz uningdin endishe qilduq” dep körsetken. Shu munasiwet bilen yaponiye tashqi ishlar ministiri masataka okani xitayning yaponiyede turushluq bash elchisini chaqirtqan. Roytérs agéntliqining qeyt qilishiche, xitay tashqi ishlar ministirliqining bayanatchisi 28-awghusttiki kündilik axbarat yighinida, xitay puqralirining yaponiyege téléfon qilip parakendichilik sélish hadisisidin xewersiz ikenlikini bildürgen. Lékin xitayning yaponiyede turushluq elchixanisi özliriningmu yaponiyelikler urghan bu xil parakendichilik téléfonlirini tapshuruwalghanliqini éytqan.

Xitay elchixanisi élan qilghan bu heqtiki bayanatida, xitayning yaponiyediki elchixana we konsulxanilirigha “Yaponiyening nurghun parakendichilik téléfonliri” ning kélip, elchixana we konsulxanilarning “Normal meshghulatigha jiddiy dexli qilghanliqi” ni éytqan. Lékin yaponiye tashqi ishlar ministirliqining bildürüshiche, bu xil parakendichilik téléfonliri yaponiyening xitayda turushluq organlirighimu kelgen. Yaponiye bash ministiri fumi'o kishida béyjingning “Puqralirigha özini tutuwélish we mes'uliyetchan bolush” heqqide küchlük chaqiriqta bolushini telep qilghan.