Yaponiyening yérim ötküzgüch éksportigha cheklime qoyushi xitaygha xiris peyda qilghan

 Yaponiyening bu yil 7-aydin bashlap yérim ötküzgüch éksportigha resmiy cheklime qoyushi xitayning bu sahediki pilanlirigha jiddiy xiris peyda qilghan. “Jenubiy xitay seher pochtisi” gézitining bildürüshiche, yaponiye bu yil 7-aydin bashlap yérim ötküzgüchke qarita éksport cheklimisini resmiy ijra qilishqa bashlaydiken. Xewerde, yaponiyening éksport cheklimisining bir yürüsh yuqiriqi téxnikiliq esliheler we matériyallargha qaritilghanliqi, halbuki bu yuqiri téxnikiliq eslihe we matériyallar xitayning ilghar yérim ötküzgech mehsulatlirigha érishish, uning yérim ötküzgüch sahesidiki pilanlirini ishqa ashurushigha chong kashila peyda qilidighanliqi'i bildürülgen.

 Xewerde éytilishiche, xitay hökümiti buningdin qattiq narazi bolghan, shundaqla yaponiyedin bu cheklimini qayta oylishishni telep qilghan. Xewerde, sana'et sahesidiki zatlar yaponiyening yéngi éksport cheklimiside 23 xil  yérim ötküzgüchke ‍alaqidar buyum we matériyallargha cheklime qoyulghanliqi, bu 23 xil mehsulatni import qilmaqchi bolghan herqandaq dölet, eger yaponiyening 42 “Dostane soda baziri” tizimlikidiki dölet bolmisa, alahide ruxset élishi telep qilinidighanliqini bildürgen. Xewerde éytilishiche, yérim ötküzgüch éksport qilishta xitay gheyriy resmiy rewishte cheklime qoyulghan dölet iken. Amérikamu xitaygha 2022-yili 10-aydin bashlap yérim ‍ötküzgüch ékisport qilishqa cheklime qoyghan.

Xewerde yaponiye xitaygha yérim ötküzgüch éksport cheklimisi qoyushta gollandiyege oxshash xitayning ismini ashkara tilgha almighan bolsimu, lékin yaponiye emeldarliri bu mehsulatlar yaponiyening “Tashqi péréwot we tashqi soda qanuni” da'irisige kiridighanliqi, bu qanun yaponiyening qoral-yaragh ékisport qilishi yaki herbiy qoral-yaraqqa özgertkili bolidighan mehsulatlarni chet'elge ékisport qilishqa cheklime qoyidu, dep chüshenche bergenliki tekitlen'gen.