Хәлқара кәчүрүм тәшкилати нахша текисти язғучиси яшар шөһрәтни қоюп беришни тәләп қилди

Вашингтондин мухбиримиз җәвлан тәйярлиди
2024.11.28

Хәлқара кәчүрүм тәшкилати 27-ноябир күни өз тор бетидә ахбарат елан қилип, 2024-йил 6-айда түрмигә қамалған музикант вә нахша текисти язғучиси яшар шөһрәтниң саламәтлик әһвалидин әндишә қиливатқанлиқини билдүргән.

Ахбаратта дейилишичә, бу йил 26 яшқа киргән яшар шөһрәт, 2022-йил 27-ноябир күни “ақ қәғәз инқилаби” ға қатнашти дегән гуман билән тутулуп, 21 күн тутуп турулғандин кейин қоюп берилгән. У 2023-йил 11-айда тутқун қилиништин илгири сичүәнниң чеңду шәһиридә яшап кәлгән, торда уйғурчә шеирларни, нахша текистлирини елан қилған, көплигән уйғурчә китабларни, болупму уйғур тарихи вә килассик әдәбиятиға аит әсәрләрни сақлиған. 2024-Йил 6-айниң 20-күни хитай һөкүмити яшарға “диний әсәбийликни тәрғиб қилиш”, “диний әсәбийликкә даир қанунсиз материялларни сақлаш” дегән җинайәтләрни артип 3 йиллиқ кесивәткән. Булар хитайниң өз мәдәнийитини сақлап қелишқа тиришқан уйғурларни нәдила болса қаттиқ бастуруватқанлиқини көрситидикән.

Бу ахбарат билән бирликтә яшар шөһрәт ишлигән рәп нахшиси текисти берилгән болуп, униңда “айрилдим әң ахирқи инсан сезимидин, издәйттим тәсәлли егилмәс бойнум вә тизимдин” дегән қурлар орун алған.

Хәлқара кәчүрүм тәшкилати яшар шөһрәтниң тутулуп қамаққа елинған мәзгилидә саламәтлик әһвалиниң начарлишип кәткәнликини, еғир дәриҗидә канай яллуғи кесилигә гириптар болуп, қәрәллик дора ичишкә мәҗбур болғанлиқини әскәртип, хитай һөкүмитидин униң саламәтликини нәзәрдә тутуп қоюп беришини тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.